پراپرٹی کیس، ایپلیٹ ٹربیونل کی سی ٹی او اسلام آباد کی ناقص کارکردگی پر سخت تنقید

اسلام آباد میں ایپلیٹ ٹربیونل ان لینڈ ریونیو (اے ٹی آئی آر) نے ایک اہم فیصلے میں کارپوریٹ ٹیکس آفس (سی ٹی او) اسلام آباد کی جانب سے جائیداد کے کاروبار سے متعلق ایک بڑے ٹیکس دہندہ کے کیس کو سنبھالنے میں پیشہ ورانہ نااہلی پر سخت تنقید کی ہے۔

ٹربیونل نے متعلقہ افسر کو ٹیکس سال 2019 سے دوبارہ ٹیکس جانچ (ری اسیسمنٹ) شروع کرنے کی ہدایت دی ہے، اور کہا ہے کہ سی ٹی او کے ٹیکس اہلکاروں کی جانب سے قانونی طریقہ کار کی سنگین خلاف ورزیاں اور قانون کی غلط تشریح کی گئی۔

ذرائع کے مطابق، حال ہی میں جاری ہونے والے اس اہم فیصلے میں اے ٹی آئی آر نے سی ٹی او اسلام آباد کی غفلت اور نااہلی کو نمایاں کیا اور سختی سے ہدایت دی کہ انکم ٹیکس آرڈیننس کی دفعات 39(3)، 69، 90، 109، 153(1)(b)، 113C اور 18(1)(d) پر مکمل عملدرآمد یقینی بنایا جائے۔

اے ٹی آئی آر نے مزید کہا کہ ان قانونی ذمہ داریوں کو پورا نہ کرنا سرکاری فرائض سے سنگین غفلت کے مترادف ہوگا اور اس سے قومی خزانے کو مسلسل نقصان پہنچے گا۔ یہ ہدایت واضح تنبیہ ہے کہ سی ٹی او کے ٹیکس افسران پیشہ ورانہ معیار پر عمل کریں اور خاص طور پر بڑے کاروباری اداروں کے معاملات میں قانون کو مؤثر انداز سے نافذ کریں۔

ٹیکس ماہرین کا کہنا ہے کہ یہ تاریخی فیصلہ نہ صرف سی ٹی او اسلام آباد کے اندرونی آپریشنل طریقہ کار کا دوبارہ جائزہ لینے کا باعث بنے گا بلکہ دیگر ٹیکس دفاتر میں بھی احتساب کے لیے نظیر قائم کرے گا۔

اے ٹی آئی آر کے فیصلے کے مطابق، اپیل کنندہ کی بنیادی کاروباری سرگرمیوں میں رئیل اسٹیٹ مارکیٹنگ، زمین، پلاٹس، اپارٹمنٹس، مکانات، پلازے، کثیرالمنزلہ عمارتیں، مارکیٹس اور دفاتر کی خرید و فروخت شامل ہے۔

فی الحال ایک نجی کمپنی کے لیے زمین کی خریداری باہمی معاہدے کے تحت لی گئی ایڈوانس کی بنیاد پر کی جا رہی ہے۔ اس لیے اس معاہدے کو سروس ایگریمنٹ قرار دیا جائے اور سیکشن 153(1)(b) کے تحت آمدن کو سروس انکم تصور کیا جائے۔ اس پر کم از کم 8 فیصد یا 29 فیصد نارمل ٹیکس لاگو کیا جائے، جو بھی زیادہ ریونیو دے۔

تقریباً 36.1 ارب روپے کی خطیر رقم ایڈوانس کے طور پر ریکارڈ کی گئی ہے۔ مزید یہ کہ ٹی ڈی آرز اور پی ایل ایس اکاؤنٹس میں کی گئی سرمایہ کاری کو درست طور پر قانونی مالکان کے تحت آمدنی تصور کرتے ہوئے دفعات 39(3)، 69، اور 90 کے تحت شامل کیا جائے۔

اے ٹی آئی آر نے فیصلہ دیا کہ تمام متعلقہ دستاویزی شواہد، انٹرکمپنی لین دین اور آڈٹ شدہ مالیاتی بیانات کا مکمل جائزہ لے کر حقیقی اقتصادی حیثیت کا تعین کیا جائے۔ ان پہلوؤں کو نظرانداز کرنا قانونی فرض کی سنگین خلاف ورزی اور قومی خزانے کو نقصان پہنچانے کے مترادف ہوگا۔