نیپرا نے کے-الیکٹرک کے دو سولر منصوبوں اور ہائبرڈ منصوبے کی بولی رپورٹس منظور کرلیں

نیشنل الیکٹرک پاور ریگولیٹری اتھارٹی (نیپرا) نے کے-الیکٹرک (کے ای ایل) کی جانب سے دو شمسی توانائی منصوبوں — 50 میگاواٹ ونڈر اور 100 میگاواٹ بیلہ — اور 220 میگاواٹ سائٹ نیوٹرل ہائبرڈ منصوبے کیلئے جمع کرائی گئی بولی جانچ رپورٹس (بی ای آرز) کی منظوری دے دی ہے۔ ان منصوبوں کا مقصد کمپنی کے پاور مکس میں سستی اور ماحول دوست توانائی کا اضافہ کرنا ہے۔

کے-الیکٹرک نے دونوں سولر منصوبوں کے لیے الگ الگ مسابقتی بولی کے عمل کا انعقاد کیا تھا اور 28 اگست 2024 کو نیپرا کو رپورٹس منظوری کے لیے جمع کروائیں۔ رپورٹس کے مطابق، ماسٹر ٹیکسٹائل ملز لمیٹڈ (ایم ٹی ایم ایل) دونوں منصوبوں میں سب سے کم بولی دینے والا ادارہ قرار پایا، جس نے تکنیکی جانچ میں کامیابی حاصل کرنے کے بعد سب سے کم مالیاتی قیمتیں پیش کیں۔

نیپرا نے اس بات کی ہدایت بھی کی کہ اگر منصوبوں کی تعمیر یا ٹرانسمیشن میں تاخیر کے باعث مالی بوجھ پڑے تو اسے صارفین پر منتقل نہ کیا جائے، اور اس شرط کو معاہدوں میں واضح طور پر شامل کیا جائے۔

اتھارٹی نے جائزہ لینے کے بعد اطمینان کا اظہار کیا کہ بولی کا عمل این سی بی ٹی آر-2017 کے ضوابط اور نیپرا کی جانب سے جاری کردہ ہدایات کے مطابق تھا۔ بیلہ اور ونڈر منصوبوں کو آئی جی سی ای پی اور پاور حصول منصوبے (پی اے پی) میں بھی شامل کیا گیا تھا، جس کی بنیاد پر نیپرا نے ان رپورٹس کو منظور کیا۔

کے-الیکٹرک نے بتایا کہ بیلہ منصوبے کے لیے فی یونٹ نرخ 11.2071 روپے (امریکی سینٹس 3.8826 فی کلو واٹ آور) اور ونڈر منصوبے کے لیے 11.6508 روپے (امریکی سینٹس 4.0363 فی کلو واٹ آور) کی کم ترین بولیاں موصول ہوئیں۔

220 میگاواٹ سائٹ نیوٹرل ہائبرڈ منصوبے کے حوالے سے بھی نیپرا نے بتایا کہ بولی کا عمل شفاف تھا اور کوئی شکایت موصول نہیں ہوئی۔ کے الیکٹرک نے ابتدائی طور پر منصوبے میں سرمایہ کاری کی خواہش ظاہر کی تھی، تاہم بعد میں اس سے دستبرداری اختیار کی، لہٰذا سرمایہ کاری سے متعلق ہدایات اب لاگو نہیں ہوں گی۔

کے-الیکٹرک نے شفافیت کو یقینی بنانے کے لیے آر ایف پی کی اشاعت، ایس اے پی، اے آر ای بی اے کے ذریعے ڈیجیٹل سبمیشن، اور تمام تر مواصلات کی ویب سائٹ پر دستیابی کو ممکن بنایا۔ نیپرا نے اس شفاف طریقہ کار کو سراہتے ہوئے رپورٹس منظور کیں۔

اتھارٹی نے کے-الیکٹرک کو ہدایت کی کہ مہنگی بجلی کی جگہ ان منصوبوں سے بجلی خریدنے کے معاشی فوائد کی وضاحت کرتے ہوئے تفصیلی ڈیٹا فراہم کیا جائے۔ کے الیکٹرک نے اس حوالے سے ایک جامع تجزیہ پیش کیا جس میں مہنگے بجلی گھروں کے متبادل کے طور پر ان منصوبوں سے ممکنہ زرمبادلہ کی بچت اور بجلی کی لاگت میں کمی دکھائی گئی۔

نیپرا نے اس بنیاد پر 220 میگاواٹ ہائبرڈ منصوبے کی بولی رپورٹ بھی منظور کر لی۔ اب یہ فیصلہ ٹیرف پٹیشن کے ریگولیٹری پراسیس کی بنیاد بنے گا، جسے متعلقہ قوانین اور ضوابط کے تحت آگے بڑھایا جائے گا۔

سی ٹی بی سی ایم انضمام پلان کے حوالے سے نیپرا نے واضح کیا کہ موجودہ بجلی خریداری معاہدوں (پی پی ایز / ای پی ایز) کی تجارتی تقسیم، نیشنل گرڈ سے سپلائی پر استعداد کاری فیس کے طریقہ کار، اور دیگر اہم نکات کی حتمی منظوری کے بعد ہی کے-الیکٹرک کا مارکیٹ میں انضمام ممکن ہو سکے گا۔

نیپرا کے مطابق، کے-الیکٹرک کو اپنی ٹیرف پٹیشن جولائی 2022 تک دائر کرنی تھی تاکہ اسے سی ٹی بی سی ایم کے فریم ورک سے ہم آہنگ کیا جا سکے، جو کہ مرکزی ڈسپیچ کے اصول پر مبنی ہے۔ اب یہ عمل سی ٹی بی سی ایم کے نفاذ کے مرحلے میں مکمل کیا جائے گا۔