حکومت نیپرا ٹربیونل میں نئے رکن کی تقرری کیلئے تیار

باخبر ذرائع نے بزنس ریکارڈر کو بتایا کہ حکومت نیا ممبر (فنانس) نیپرا اپیلیٹ ٹربیونل میں تعینات کرنے جا رہی ہے کیونکہ سندھ حکومت کی جانب سے تجویز کردہ حالیہ امیدوار نے عہدہ سنبھالنے سے معذرت کر لی ہے۔

اسلام آباد میں قائم نیشنل الیکٹرک پاور ریگولیٹری اتھارٹی (نیپرا) اپیلیٹ ٹربیونل، ”ریگولیشن آف جنریشن، ٹرانسمیشن اینڈ ڈسٹری بیوشن آف الیکٹرک پاور (ترمیمی) ایکٹ 2018“ (عام طور پر نیپرا ایکٹ کے نام سے جانا جاتا ہے) کی دفعہ 12-اے کے تحت قائم کیا گیا تھا۔ اس ٹربیونل کو پورے ملک پر دائرہ اختیار حاصل ہے۔

نیپرا ایکٹ کے مطابق، ٹربیونل ایک چیئرمین اور دو ممبران پر مشتمل ہوتا ہے— ایک برائے فنانس اور دوسرا برائے الیکٹریسٹی۔ دفعات 12-اے اور 12-بی ممبران کے لیے اہلیت، قابلیت اور مدتِ ملازمت سے متعلق ہیں۔ خصوصاً دفعہ 12-اے کے تحت ممبر (فنانس) کے لیے درج ذیل معیار مقرر ہیں:

ممبر (فنانس) ایسا فرد ہوگا جو کوالیفائیڈ چارٹرڈ اکاؤنٹنٹ، کوالیفائیڈ کاسٹ اینڈ مینجمنٹ اکاؤنٹنٹ یا کوالیفائیڈ چارٹرڈ فنانشل اینالسٹ ہو۔

ممبر (فنانس) کو تین سال کی مدت کے لیے تعینات کیا جاتا ہے، اور اس کی شرائط و ضوابط متعلقہ قواعد کے مطابق طے کیے جاتے ہیں۔ مزید یہ کہ ایکٹ کے تحت کوئی ایسا شخص جس کی عمر 60 سال یا اس سے زائد ہو، اسے ممبر (فنانس) مقرر نہیں کیا جا سکتا۔

اس کے علاوہ، کسی شخص کو اس وقت تک ٹربیونل کا ممبر مقرر نہیں کیا جا سکتا جب تک کہ: 1 . اس کے پاس کسی تسلیم شدہ یونیورسٹی سے کم از کم ماسٹرز یا پروفیشنل ڈگری یا قابلیت نہ ہو؛ 2. کم از کم پندرہ سال کا پیشہ ورانہ تجربہ نہ ہو؛ 3. کسی فوجداری مقدمے میں سزا یافتہ نہ ہو، سوائے معمولی نوعیت کے جرائم کے؛ 4. اس کا ماضی ایسا نہ ہو جو اس کی ایمانداری، دیانت، قابلیت یا غیر جانبداری پر سوال اٹھائے۔

قبل ازیں، سندھ حکومت کی جانب سے نامزد امیدوار کو کابینہ ڈویژن نے منظوری دے دی تھی، تاہم نامزد شخص نے بعد ازاں ممبر (فنانس)، نیپرا اپیلیٹ ٹربیونل، اسلام آباد کے عہدے پر فائز ہونے سے انکار کر دیا۔

اب حکومتِ سندھ سے دوبارہ درخواست کی گئی ہے کہ وہ مذکورہ قانون کے تحت ممبر (فنانس) کی تقرری کے لیے نئے موزوں امیدواروں کے نام ارسال کرے۔ اس مقصد کے لیے تین امیدواروں پر مشتمل پینل، ان کے بائیو ڈیٹا اور سروس ریکارڈ سمیت متعلقہ ڈویژن کو بھجوایا جائے تاکہ ان کا تقرر کیا جا سکے۔ وزارت قانون و انصاف نے پاور ڈویژن سے درخواست کی ہے کہ وہ جلد از جلد نامزدگیاں ارسال کرے تاکہ نیپرا اپیلیٹ ٹربیونل، اسلام آباد میں ممبر (فنانس) کی تقرری عمل میں لائی جا سکے۔

کاپی رائٹ بزنس ریکارڈر، 2025