پاور ڈویژن آج سے آئی ایم ایف کو بجلی کے شعبے میں اصلاحات سے متعلق بریفنگ دے گا

پاور ڈویژن آج (15 مئی) سے بین الاقوامی مالیاتی فنڈ (آئی ایم ایف) کو بجلی کے شعبے میں گردشی قرضے، سالانہ ٹیرف ری بیسنگ، سبسڈی کے سائز اور کمپوزیشن اور کاربن لیوی قانون سازی پر تفصیلی بریفنگ دے گا۔ یہ مذاکرات 16 مئی تک جاری رہیں گے۔

ذرائع کے مطابق وزیراعظم شہباز شریف کی حکومت نے توانائی کے شعبے، بالخصوص بجلی اور گیس کے نظام میں اصلاحات سے متعلق کئی نئے وعدے آئی ایم ایف سے کیے ہیں جن میں ریگولر ٹیرف میں اضافہ، گردشی قرضے کو سنٹرل پاور پرچیزنگ ایجنسی (سی پی پی اے-جی) میں منتقل کرنا، اور نئی سبسڈی کے مکمل خاتمے جیسے اقدامات شامل ہیں۔

حکومت نے آئی ایم ایف کو یقین دہانی کرائی ہے کہ بجلی و گیس پر دی جانے والی سبسڈی کو بینظیر انکم سپورٹ پروگرام (بی آئی ایس پی) سے ہم آہنگ کیا جائے گا تاکہ صرف مستحق صارفین کو فائدہ دیا جا سکے۔ اس مقصد کے لیے حکومت جون 2025 تک آگاہی مہم شروع کرے گی، جنوری 2026 تک مستحق صارفین کی شناخت مکمل کی جائے گی، جبکہ جولائی 2026 تک اہلیت کے معیار اور مالیاتی اداروں کے ساتھ رعایتی طریقہ کار کو حتمی شکل دی جائے گی۔

گردشی قرضہ مینجمنٹ پلان (سی ڈی ایم پی) کے مطابق، حکومت نے آئی ایم ایف سے وعدہ کیا ہے کہ بجلی کے ٹیرف میں بروقت اضافہ کیا جائے گا تاکہ لاگت کی وصولی کو یقینی بنایا جا سکے۔ نیپرا ماہانہ فیول ایڈجسٹمنٹ اور سہ ماہی ٹیرف ایڈجسٹمنٹس جاری رکھے گی تاکہ سال بھر کے دوران پیدا ہونے والے مالی خسارے کو قابو میں رکھا جا سکے۔ تمام صوبوں نے گیس و بجلی پر کسی بھی نئی سبسڈی نہ دینے پر اتفاق کیا ہے۔

گردشی قرضہ جس کا موجودہ حجم 2.4 کھرب روپے (جی ڈی پی کا 2.1 فیصد) ہے، اسے مالی سال 2025 کے اختتام تک ختم کرنے کا ہدف رکھا گیا ہے۔ اس میں سے 348 ارب روپے انڈیپنڈنٹ پاور پروڈیوسرز (آئی پی پیز) سے مذاکرات کے ذریعے، 387 ارب روپے سود کی معافی، اور 254 ارب روپے سبسڈی کے ذریعے کلیئر کیے جائیں گے۔ مزید 1.252 کھرب روپے بینکوں سے قرض لے کر پاور ہولڈنگ کمپنی کے قرضوں اور سود پر مبنی واجبات کی ادائیگی کے لیے استعمال کیے جائیں گے۔

یہ قرضہ نسبتاً کم شرح سود پر لیا جائے گا اور اس کی ادائیگیاں آئندہ چھ سالوں میں ڈیٹ سروس سرچارج (ڈی ایس ایس) کی مد میں کی جائیں گی، جس کی شرح نیپرا کے مقرر کردہ ریونیو کے 10 فیصد کے برابر ہوگی۔ اگر ڈی ایس ایس کی وصولی کم ہوئی تو اس میں اضافہ کیا جائے گا۔ حکومت جون 2025 تک ڈی ایس ایس کی 10 فیصد حد ختم کرنے کے لیے قانون سازی کرے گی۔

حکومت نے آئندہ مالی سال کے بجٹ میں سود پر مبنی بقایاجات (337 ارب روپے تک) کی بروقت ادائیگی کے لیے بھی منصوبہ تیار کر لیا ہے تاکہ آئندہ گردشی قرضے میں اضافے کی رفتار سست ہو جائے۔ حکومت کا ہدف ہے کہ مالی سال 2031 تک گردشی قرضہ مکمل ختم کر دیا جائے۔

توانائی ڈویژن فروری 2027 کے آخر تک الیکٹرک گاڑیوں (ای ویز) کے چارجنگ اسٹیشنز سے متعلق اپ ڈیٹ بھی فراہم کرے گا۔ نجی سرمایہ کاری کی حوصلہ افزائی کے لیے حکومت ”وائی ایبلٹی گیپ فنڈنگ (وی جی ایف)“ کا فریم ورک متعارف کرائے گی جو کہ شفاف بولی، واضح اہلیت کے معیار، اور ایک بار دی جانے والی سبسڈی پر مبنی ہوگا۔

وزارت خزانہ نے توانائی ڈویژن کو مطلع کیا ہے کہ مالی سال 26-2025 میں بجلی کے شعبے کے لیے سبسڈی کا حجم دستیاب مالی گنجائش سے مشروط ہوگا۔ بجٹ کی حتمی منظوری اسٹینڈرڈ بجٹ پراسیس کے ذریعے، بجٹ و کارپوریٹ فنانس ونگ کی مشاورت سے کی جائے گی۔

کاپی رائٹ بزنس ریکارڈر، 2025