سعودی عرب میں پاک بھارت مذاکرات متوقع

بزنس ریکارڈر کو سفارتی ذرائع نے بتایا ہے کہ پاکستان اور بھارت کے درمیان اعلیٰ سطح مذاکرات متوقع ہیں جو کہ سعودی عرب میں امریکی اور سعودی ثالثی کے تحت ہوں گے۔

یہ مذاکرات متنازع کشمیر مسئلے اور سندھ طاس معاہدے (آئی ڈبلیو ٹی) پر مرکوز ہوں گے، جو کہ دونوں ایٹمی قوتوں کے درمیان اہم تنازعات میں شامل ہیں۔

یہ پیش رفت امریکی صدر ڈونلڈ ٹرمپ اور وزیر خارجہ مارکو روبیو کی تازہ سفارتی کوششوں کے بعد سامنے آئی ہے، جنہوں نے حالیہ پاک بھارت تنازع کے بعد مذاکرات کی بحالی کے لیے ابتدائی معاہدہ طے کرایا ہے۔

ذرائع کے مطابق واشنگٹن اور ریاض ان مذاکرات میں ثالثی کا کردار ادا کریں گے۔ بھارت پہلے ہی واضح کر چکا ہے کہ وہ صرف دہشتگردی اور آزاد جموں و کشمیر (اے جے کے) پر بات کرے گا، جبکہ وہ مقبوضہ جموں و کشمیر پر گفتگو سے انکار کر چکا ہے۔ اس کے برعکس، پاکستان وسیع تر کشمیر مسئلے اور سندھ طاس معاہدے پر بات چیت پر زور دے رہا ہے۔

ایک سینئر پاکستانی عہدیدار نے بزنس ریکارڈر کو بتایا کہ ہمیں امید ہے کہ کشمیر مسئلہ اور سندھ طاس معاہدے کے تنازع دونوں پر کوئی پیش رفت ہوگی، جنہیں بھارت نے پہلگام حملے کے بعد مؤخر کر رکھا ہے۔ امریکی اور سعودی شمولیت کے باعث مذاکرات کی شیڈولنگ میں تیزی آئی ہے۔

حالیہ کشیدگی کے تناظر میں، واشنگٹن نے کشمیر مسئلے پر ثالثی کی پیشکش کی ہے — جو کہ ایک دیرینہ تنازع ہے — اور نئی دہلی اور اسلام آباد پر زور دیا ہے کہ وہ بات چیت کے ذریعے مسئلہ حل کریں تاکہ مزید کشیدگی سے بچا جا سکے۔

دباؤ بڑھانے کے لیے امریکہ نے دونوں ممالک کو یہ انتباہ بھی دیا ہے کہ اگر بامقصد مذاکرات نہ کیے گئے تو ان کے ساتھ تجارتی تعلقات معطل کیے جا سکتے ہیں۔

اس معاملے پر جب رابطہ کیا گیا تو اسلام آباد میں امریکی سفارتخانے اور پاکستانی دفتر خارجہ دونوں نے کوئی تبصرہ کرنے سے گریز کیا۔

کاپی رائٹ بزنس ریکارڈر، 2025