کلائمیٹ ریزیلینس، وزیر خزانہ کا فوری عالمی اقدامات کا مطالبہ

وفاقی وزیر برائے خزانہ و محصولات، سینیٹر محمد اورنگزیب نے واشنگٹن میں منعقدہ 2025 کے ورلڈ بینک گروپ/آئی ایم ایف اسپرنگ اجلاسوں کے موقع پر اعلیٰ سطح ملاقاتوں کے دوران کلائمیٹ ریزیلینس، غیرملکی سرمایہ کاری کے فروغ اور معیشت میں تنوع کی اہمیت پر زور دیا۔

ہفتہ کو وزارت خزانہ کی جانب سے جاری کردہ اعلامیے کے مطابق، فنڈ فار ریسپانڈنگ ٹو لاس اینڈ ڈیمیج (ایف آر ایل ڈی) کے اعلیٰ سطح مکالمے میں وزیر خزانہ نے پاکستان کے لیے ماحولیاتی تبدیلی کو وجودی خطرہ قرار دیا اور 2022 کے تباہ کن سیلابوں کا حوالہ دیتے ہوئے نقصان و تلافی فنڈ کو فوری، آسان اور مؤثر احتسابی طریقہ کار کے ساتھ عملی جامہ پہنانے کی ضرورت پر زور دیا۔ انہوں نے متاثرہ ممالک کے لیے فنڈز کی جلد فراہمی کا مطالبہ بھی کیا۔

ملٹی لیٹرل انویسٹمنٹ گارنٹی ایجنسی (میگا) کے ایگزیکٹو نائب صدر ہیروشی ماتانو سے ملاقات میں، وزیر خزانہ نے اسٹار ہائیڈرو پاور تنازعے کے حل میں میگا کی کوششوں کو سراہا اور ممکنہ ٹریڈ فنانس سہولت کے لیے مکمل تعاون کا یقین دلایا۔ انہوں نے میگا کے وفد کے آئندہ دورۂ پاکستان کا خیرمقدم کرتے ہوئے اس سال معاہدے کو حتمی شکل دینے کی امید ظاہر کی۔

وزیر خزانہ نے امریکی محکمہ خارجہ کے سینئر اہلکار تھامس لرسٹن سے بھی ملاقات کی اور پاکستان میں منعقدہ منرلز کانفرنس میں امریکہ کی بھرپور شرکت پر شکریہ ادا کیا۔ انہوں نے ٹیرف مسائل کے حل کے لیے تعمیری روابط کی خواہش کا اظہار کیا اور بتایا کہ ایک اعلیٰ سطح تجارتی و سرمایہ کاری وفد جلد امریکہ کا دورہ کرے گا۔

بین الاقوامی مالیاتی کارپوریشن (آئی ایف سی) کے مینیجنگ ڈائریکٹر مختار دیوپ سے ملاقات میں وزیر خزانہ نے پاکستان کے مضبوط میکرو اکنامک اشاریے اور حالیہ فیچ کریڈٹ ریٹنگ اپ گریڈ پر روشنی ڈالی۔ انہوں نے کراچی ایئرپورٹ سے متعلق مشاورتی عمل میں تیزی اور صوبائی سطح پر گورننس کی صلاحیتوں کی تعمیر پر زور دیا۔

امریکی ایکسپورٹ-امپورٹ بینک کے وفد، جس کی قیادت جم بیروز نے کی، سے ملاقات میں وزیر خزانہ نے پاکستان کی بہتر ہوتی معاشی بنیادیات اور مالیاتی استحکام کے لیے کیے گئے اقدامات پر بریفنگ دی اور آئی ایم ایف کے ساتھ اسٹاف لیول معاہدے (ای ایف ایف اور آر ایس ایف) کے بارے میں آگاہ کیا۔

ریکوڈک منصوبے پر پیش رفت سے آگاہ کرتے ہوئے، وزیر خزانہ نے پاکستان میں امریکی سرمایہ کاری کے لیے ایگزم بینک کی معاونت بڑھانے کی اپیل کی اور ٹیرف مسائل کے حل کی خواہش ظاہر کی۔

جے پی مورگن چیس سے بات چیت میں وزیر خزانہ نے پاکستان کے مستحکم معاشی سفر اور منڈیوں کے تنوع کے منصوبوں پر روشنی ڈالی۔ انہوں نے ابتدائی پانڈا بانڈ اجرا کے ذریعے عالمی سرمایہ منڈیوں میں واپسی کے ارادے کا اعادہ کیا۔

آئی ایم ایف کے زیر اہتمام ”غیریقینی دنیا میں راستہ نکالنا“ کے موضوع پر پینل گفتگو میں، وزیر خزانہ محمد اورنگزیب نے عالمی غیر یقینی صورتحال کے تناظر میں علاقائی تجارت کے فروغ کی اہمیت کو اجاگر کیا۔ انہوں نے شعبہ جاتی اور منڈی کے تنوع کی وکالت کی اور درآمدی متبادل کے بجائے برآمدی ترقی کو ترجیح دینے کی ضرورت پر زور دیا، آئی ٹی سیکٹر کو کلیدی محرک کے طور پر شناخت کیا۔

بعد ازاں، وزیر خزانہ نے امریکی انٹرنیشنل ڈویلپمنٹ فنانس کارپوریشن (ڈی ایف سی) کے قائم مقام سی ای او دیو جاگادیسن سے ملاقات کی اور ریکوڈک سمیت منصوبہ جات پر تبادلہ خیال کیا اور پاک-امریکہ تعاون کے امکانات پر بات کی۔

وزیر خزانہ نے برطانیہ کی وزیر برائے بین الاقوامی ترقی، بیرونس چیپمین سے بھی ملاقات کی اور پاکستان کے ساتھ برطانیہ کی دیرینہ شراکت داری پر ان کا شکریہ ادا کیا۔

انہوں نے انہیں ورلڈ بینک کے دس سالہ کنٹری پارٹنرشپ فریم ورک (سی پی ایف) کے بارے میں بریفنگ دی، جو آبادی اور ماحولیاتی لچک پر مرکوز ہے۔ وزیر خزانہ نے ٹیکنالوجی کے ذریعے ٹیکس نظام میں بہتری کی اہمیت اور ترقیاتی معاونت کو مؤثر طریقے سے نقشہ بندی کے لیے آر ای ایم آئی ٹی اقدام کی تعریف کی۔