پاکستان اور جاپان کا ٹیکنالوجی و ڈیجیٹل اکانومی کے شعبوں میں تعاون بڑھانے پر اتفاق
پاکستان اور جاپان نے ٹیکنالوجی اور ڈیجیٹل معیشت کے شعبوں میں تعاون بڑھانے پر اتفاق کیا ہے، جس کا مقصد جاپان کی ڈیجیٹل ٹرانسفارمیشن میں مہارت سے فائدہ اٹھاتے ہوئے پاکستان کی ڈیجیٹل ترقی کو فروغ دینا ہے۔
یہ پیشرفت وزارتِ انفارمیشن ٹیکنالوجی و ٹیلی کمیونیکیشن میں جاپان کے سفیر اکاماتسو سوچی اور وفاقی وزیر برائے آئی ٹی و ٹیلی کمیونیکیشن شزا فاطمہ کے درمیان ہونے والی ملاقات کے دوران ہوئی۔
ملاقات کے دوران دونوں جانب سے انفارمیشن اینڈ کمیونیکیشن ٹیکنالوجی (آئی سی ٹی)، ابھرتی ہوئی ٹیکنالوجیز اور ڈیجیٹل گورننس میں دو طرفہ تعاون کو مضبوط بنانے کے امکانات پر تبادلہ خیال کیا گیا۔ وفاقی وزیر شزا فاطمہ خواجہ نے وزیراعظم کے وژن ”ڈیجیٹل پاکستان“ کے تحت حکومت کے ڈیجیٹل ترقی کے عزم پر زور دیا اور ملک کے ٹیکنالوجی منظرنامے کو تبدیل کرنے اور نوجوانوں کو مستقبل کے تقاضوں سے ہم آہنگ مہارتیں فراہم کرنے کے لیے اسٹریٹجک شراکت داری کی اہمیت کو اجاگر کیا۔
دونوں جانب نے خاص طور پر جاپان کے ڈیجیٹل ٹرانسفارمیشن کے شعبے میں ترقی یافتہ تجربات سے استفادے کی اہمیت پر زور دیا۔ بات چیت میں انسانی وسائل کی ترقی، مصنوعی ذہانت، ڈیجیٹل تعلیم و تربیت، اور پاکستانی نوجوانوں کے لیے روزگار کے مواقع میں توسیع جیسے موضوعات بھی زیر غور آئے۔
دونوں فریقین نے مقامی افرادی قوت کی مہارتوں میں اضافہ اور ٹیکنالوجی کے شعبے میں تعلیم، تحقیق اور جدت کو فروغ دینے کے لیے مشترکہ اقدامات شروع کرنے کی اہمیت پر اتفاق کیا۔ اس کے علاوہ، انفارمیشن اینڈ کمیونیکیشن ٹیکنالوجی (آئی سی ٹی)، مصنوعی ذہانت (اے آئی) اور ڈیجیٹل گورننس میں مشترکہ تربیتی پروگراموں کے امکانات پر بھی غور کیا گیا۔
سفیر اکاماتسو سوچی نے پاکستان میں تعلیم اور ٹیکنالوجی کے فروغ کے لئے جاپان کے مکمل تعاون کی یقین دہانی کرائی۔ انہوں نے پاکستان کو ڈیجیٹل طور پر بااختیار ملک بنانے کے سفر میں اپنا کردار ادا کرنے پر آمادگی کا اظہار کیا۔
ملاقات مثبت انداز میں اختتام پذیر ہوئی جس میں دونوں ممالک نے اہم ٹیکنالوجی شعبوں میں دوطرفہ تعاون کو گہرا کرنے اور مشترکہ ڈیجیٹل اہداف کے حصول کے لئے مل کر کام کرنے کے عزم کا اعادہ کیا۔
کاپی رائٹ بزنس ریکارڈر، 2025
Comments
Comments are closed.