ایف بی آر نے وصولیوں میں خامیوں کی نشاندہی کیلئے ڈائریکٹر جنرل آفس قائم کردیا

فیڈرل بورڈ آف ریونیو (ایف بی آر) نے ریونیو جمع کرنے کے طریقہ کار میں خامیوں کی نشاندہی کرنے اورغلط اعلانات، انڈر انوائسنگ/ مس انوائسنگ اور اسمگلنگ کے خاتمے کے لیے ڈائریکٹر جنرل (اسپیشل انیشی ایٹوز کسٹمز) کا دفتر قائم کیا ہے۔

اس حوالے سے ایف بی آر نے نوٹیفکیشن جاری کر دیا ہے۔

ایف بی آر کی جانب سے جاری نوٹیفکیشن میں کہا گیا ہے کہ ایف بی آر نے ایف بی آر میں ڈائریکٹر جنرل (اسپیشل انیشی ایٹوز کسٹمز) اور دو ڈائریکٹرز (اسپیشل انیشی ایٹوز کسٹمز) کے دفتر کے قیام کی منظوری دے دی ہے جو ریونیو کلیکشن میکنزم (اگر کوئی ہو) میں خامیوں کی نشاندہی کرنے، غلط اعلان کی روک تھام کے اقدامات اور انڈر انوائسنگ/مس انوائسنگ سے متعلق اقدامات پر تبادلہ خیال کرنے اور اسمگلنگ کی روک تھام کی کوششوں کو مزید بہتر کرنے کے لیے فیلڈ فارمیشنز کے ساتھ تعاون کریں گے۔

یہ کوششیں نہ صرف متعدد پیچیدہ پیشہ ورانہ رکاوٹوں کو دور کرنے میں مددگار ثابت ہوں گی بلکہ ٹیکس وصولی کی کوششوں میں بہت سی غیر ضروری رکاوٹوں کو بھی دور کریں گی جس سے قومی خزانے کو بھاری نقصان پہنچ رہا ہے۔ ڈائریکٹر جنرل (اسپیشل انیشی ایٹوز- کسٹمز) کسٹمز سے متعلق امور کے حوالے سے دیگر وزارتوں/ ڈویژنز/ محکموں کے ساتھ بھی تعاون کریں گے۔

ڈائریکٹر جنرل / ڈائریکٹرز (خصوصی اقدامات - کسٹمز) کے دفتر کے لئے نمایاں خصوصیات / افعال درج ذیل ہیں: -

ڈائریکٹر جنرل/ڈائریکٹرز (اسپیشل انیشی ایٹو کسٹمز) بورڈ کی جانب سے تفویض کردہ کسٹم معاملات کے حوالے سے فیلڈ فارمیشنز، دیگر وزارتوں/ ڈویژنز/ محکموں اور صوبائی حکام کے ساتھ رابطہ کاری اور معلومات کے تبادلے کا طریقہ کار برقرار رکھیں گے۔

ڈائریکٹر جنرل/ ڈائریکٹرز (اسپیشل انیشی ایٹو کسٹمز) محصولات جمع کرنے کے نظام (اگر کوئی ہو) میں لوپ ہولز کی نشاندہی اور جانچ پڑتال کریں گے اور اصلاحی اقدامات تجویز کریں گے تاکہ ان خامیوں کو مؤثر طریقے سے دور کیا جا سکے۔

ڈائریکٹر جنرل/ڈائریکٹرز (اسپیشل انیشی ایٹو کسٹمز) غلط بیانی اور انڈر انوائسنگ کی کوششوں کے خاتمے کے لیے اقدامات تجویز کریں گے۔

ایف بی آر کی جانب سے جاری اعلامیے میں کہا گیا ہے کہ ڈائریکٹر جنرل/ڈائریکٹرز (اسپیشل انیشی ایٹو کسٹمز) کسٹمز اکیڈمی پاکستان کو خصوصی کورسز/ورکشاپس ڈیزائن کرنے میں مشورہ دیں گے تاکہ کسٹمز افسران اور اہلکاروں میں غلط بیانی اور انڈر انوائسنگ نظام کے بارے میں آگاہی پیدا کی جا سکے۔

کاپی رائٹ بزنس ریکارڈر، 2025