درآمد کنندگان کے ساتھ تنازعات، ایف بی آر نے ’کلاسیفکیشن سینٹر‘ قائم کر دیا

فیڈرل بورڈ آف ریونیو (ایف بی آر) نے درآمدی اشیاء کی درجہ بندی کے تنازعات کو حل کرنے کے لیے ”کلاسفکیشن سینٹر“ قائم کر دیا ہے، جس کا مقصد درآمد کنندگان اور کسٹمز حکام کے درمیان زیر التواء معاملات کو 31 اگست 2025 تک نمٹانا ہے۔ اس کے ساتھ ساتھ، نئے تنازعات کے حل کے لیے 120 دن کی مدت مقرر کی گئی ہے، جس میں مزید 30 دن کی توسیع کی اجازت چیف کلیکٹر کسٹمز ایپریزمینٹ ساؤتھ، کراچی دے سکتے ہیں۔

ایف بی آر کے جاری کردہ حکم نامے کے تحت، کلاسفکیشن سینٹر تمام نئے تنازعات کو 120 دن کے اندر کلاسفکیشن رولنگز کے ذریعے حل کرے گا، جبکہ پہلے سے زیر التواء تمام کیسز کو بھی ترجیحی بنیادوں پر 31 اگست 2025 تک مکمل کرنے کی ہدایت دی گئی ہے۔ یہ مرکز کراچی میں کلیکٹوریٹ آف کسٹمز ایپریزمینٹ-ایسٹ میں قائم کیا گیا ہے، جو کسٹمز کلیکٹریٹس، ڈائریکٹوریٹس اور تاجروں کے حوالے کردہ تنازعات کا جائزہ لے گا۔

کلاسفکیشن کمیٹی میں کلیکٹر کسٹمز، ایپریزمینٹ-ایسٹ، کلیکٹر کسٹمز، ایپریزمینٹ-ویسٹ، اور کلیکٹر کسٹمز، ایس اے پی ٹی، کراچی شامل ہوں گے، جبکہ ایڈیشنل کلیکٹر (ہیڈکوارٹرز)، کلیکٹوریٹ آف کسٹمز ایپریزمینٹ-ایسٹ، کراچی کمیٹی کے سیکرٹری کے طور پر خدمات انجام دیں گے۔ کمیٹی ہر ماہ کم از کم دو اجلاس منعقد کرے گی اور ضرورت پڑنے پر آن لائن اجلاس بھی کر سکتی ہے۔

کلاسفکیشن سینٹر کا کام تنازعات کے حل کے علاوہ عالمی کسٹمز تنظیم کے ساتھ معلومات کا تبادلہ، سالانہ درجہ بندی رپورٹ کی اشاعت، اور پاکستان کسٹمز اکیڈمی کے تعاون سے افسران اور عملے کی تربیت فراہم کرنا بھی ہوگا۔ کمیٹی تاجروں، ان کی تجارتی تنظیموں اور ماہرین کو بھی اجلاسوں میں مدعو کر سکتی ہے تاکہ درجہ بندی تنازعات کو زیادہ شفاف طریقے سے حل کیا جا سکے۔

ایف بی آر کے مطابق، تمام مقامی درجہ بندی کمیٹیاں ختم کر دی گئی ہیں اور ان کے زیر التواء کیسز فوری طور پر مرکزی کلاسفکیشن کمیٹی کو بھیجے جائیں گے۔ اس اقدام کا مقصد درآمدی اشیاء کی درجہ بندی کے تنازعات کو مؤثر اور شفاف طریقے سے حل کرنا ہے تاکہ تجارتی عمل میں سہولت پیدا کی جا سکے۔

کاپی رائٹ بزنس ریکارڈر، 2025