کابینہ کمیٹی نے پی آئی اے کی نجکاری کی منظوری دیدی

نائب وزیراعظم اور وزیر خارجہ اسحاق ڈار کی سربراہی میں کابینہ کمیٹی برائے نجکاری (سی سی او پی) نے پاکستان انٹرنیشنل ایئرلائنز (پی آئی اے سی ایل) کے 51 سے 100 فیصد شیئر کیپٹل کی نجکاری اور انتظامی کنٹرول کی منتقلی کی منظوری دے دی ہے۔ اس نجکاری کے تحت، حصص کی فروخت پی آئی اے ہولڈکو کے زیر ملکیت شیئرز یا نئے شیئرز کی سبسکرپشن یا دونوں کا امتزاج ہو سکتی ہے، جبکہ آئی ایم ایف نے بعض شرائط کے تحت اس اقدام کی منظوری دے دی ہے۔

وفاقی کابینہ نے 6 فروری 2024 کو اپنے فیصلے میں نجکاری کے ڈھانچے پر غور کرتے ہوئے پی آئی اے کے 51 سے 100 فیصد شیئرز اور انتظامی کنٹرول کی منتقلی کی منظوری دی تھی۔

نجکاری کمیشن نے اس فیصلے کے مطابق نجکاری کا عمل شروع کیا اور بولی کا انعقاد کیا، جس کے تحت 85.03 ارب روپے کے حوالہ جاتی قیمت کے مقابلے میں 10 ارب روپے کی واحد بولی موصول ہوئی۔ کابینہ کمیٹی برائے نجکاری نے 31 اکتوبر 2024 کے اجلاس میں اس عمل کے قواعد و ضوابط منظور کیے تھے، تاہم 14 نومبر 2024 کو سی سی او پی نے نجکاری کمیشن کے بورڈ کی سفارش پر اس بولی کو مسترد کر دیا۔

نجکاری کمیشن کے بورڈ نے 12 نومبر 2024 کے اجلاس میں فیصلہ کیا کہ آئی ایم ایف کو 18 فیصد سیلز ٹیکس کی چھوٹ اور منفی ایکویٹی ختم کرنے کے حوالے سے قائل کیا جائے تاکہ نجکاری کا عمل بہتر ہو اور سرمایہ کاروں کی دلچسپی پیدا کی جا سکے۔ اس کے بعد پی آئی اے کی نجکاری کے لیے نئے سرے سے دلچسپی کے اظہار (ای او آئی) کی درخواست دی جائے گی۔

اس فیصلے کی روشنی میں نومبر اور دسمبر 2024 میں آئی ایم ایف سے مذاکرات کیے گئے، جس کے بعد 11 دسمبر 2024 کو آئی ایم ایف نے مخصوص شرائط کے ساتھ ان مطالبات کو قبول کر لیا۔

وزیراعظم کی زیر صدارت 12 دسمبر 2024 کو وزیراعظم آفس میں ایک اعلیٰ سطحی اجلاس منعقد ہوا، جس میں پی آئی اے سی ایل کی نجکاری کے اگلے مراحل پر غور کیا گیا۔ اجلاس میں اس بات پر اتفاق کیا گیا کہ آئی ایم ایف کی رضامندی اور نجکاری کے پہلے مرحلے میں پیدا ہونے والی پیش رفت کو مدنظر رکھتے ہوئے مزید نقصان سے بچنے کے لیے مقامی و بین الاقوامی اخبارات میں سرمایہ کاروں کی دلچسپی کے اظہار کے لیے اشتہارات شائع کیے جائیں گے۔

مزید برآں، وزیراعظم کی ہدایت پر 19 دسمبر 2024 کو اسپیشل انویسٹمنٹ فیسلیٹیشن کونسل (ایس آئی ایف سی) سیکریٹریٹ نے ایک مارکیٹنگ کمیٹی تشکیل دی، جس میں وزیر نجکاری (چیئرمین)، وزیر پیٹرولیم، وزیر مملکت برائے خزانہ اور ایس آئی ایف سی کے نیشنل کوآرڈینیٹر کو شامل کیا گیا۔ اس کمیٹی کو ممکنہ سرمایہ کاروں سے رابطے کا مینڈیٹ دیا گیا۔

کمیٹی نے 24 دسمبر 2024، 14 جنوری اور 11 فروری 2025 کو تین اجلاس منعقد کیے، جن میں نجکاری کے عمل کے مختلف پہلوؤں کا جائزہ لیا گیا۔

مارکیٹنگ کمیٹی اور مالیاتی مشیر (ای وائی کنسلٹنگ ایل ایل سی، دبئی) کی سفارشات کی روشنی میں، نجکاری کمیشن کے بورڈ نے 17 مارچ 2025 کو پی آئی اے کی نجکاری کے دوسرے مرحلے کے لیے درج ذیل ڈھانچہ تجویز کیا:

I. پی آئی اے سی ایل کے 51 سے 100 فیصد شیئر کیپٹل کی نجکاری اور انتظامی کنٹرول کی منتقلی، جیسا کہ وفاقی کابینہ نے 6 فروری 2024 کو منظور کیا تھا۔
II. ایکویٹی اسٹیک میں پی آئی اے سی ایل کے شیئرز کی فروخت، نئی شیئر سبسکرپشن یا دونوں کا امتزاج شامل ہو سکتا ہے۔
III. بولی کے دوران شرائط و ضوابط کو حتمی شکل دی جائے گی، جو ممکنہ طور پر پہلی نجکاری کی کوشش میں مقرر کردہ شرائط سے مختلف ہو سکتی ہیں۔

نجکاری کمیشن بورڈ کی سفارشات کے مطابق، پی آئی اے سی ایل کی نجکاری کے عمل کو دوبارہ شروع کرنے کی تجویز کو سی سی او پی کی منظوری کے لیے پیش کیا گیا ہے۔

سرکاری اعلامیے کے مطابق، کمیٹی نے پی آئی اے کی نجکاری کے تیز رفتار منصوبے کی منظوری دے دی ہے، جس میں 51 سے 100 فیصد شیئر کیپٹل کی منتقلی شامل ہے۔ نائب وزیراعظم نے حکومت کی پی آئی اے سی ایل کی نجکاری کے عزم کو دہرایا، تاکہ ادارے کی مکمل صلاحیت کو بروئے کار لایا جا سکے اور قومی خزانے پر مالی بوجھ کم کیا جا سکے۔

کاپی رائٹ بزنس ریکارڈر، 2025