غزہ میں شہادتوں کی تعداد 50 ہزار سے تجاوز کر گئی، اسرائیل نے مزید فلسطینیوں کو شہید کر دیا

غزہ میں وزارت صحت نے اتوار کے روز کہا ہے کہ اکتوبر 2023 سے مسلسل اسرائیلی فضائی اور زمینی حملوں میں فلسطینی علاقے میں کم از کم 50،021 افراد شہید ہو چکے ہیں۔

وزارت صحت کی جانب سے جاری بیان میں کہا گیا ہے کہ 7 اکتوبر 2023 سے اب تک اسرائیلی جارحیت میں 50 ہزار 21 فلسطینی شہید اور ایک لاکھ 13 ہزار 274 زخمی ہوچکے ہیں۔

علاقے کی سول ڈیفنس ایجنسی نے اپنے ریکارڈ کا حوالہ دیتے ہوئے یہ بھی بتایا کہ شہادتوں کی تعداد 50 ہزار سے تجاوز کر گئی ہے۔

اقوام متحدہ نے وزارت صحت کے اعداد و شمار کو قابل اعتماد قرار دیا ہے۔

اسرائیل کی جانب سے غزہ کی پٹی پر شدید بمباری اور نئے سرے سے زمینی حملے کے بعد 19 جنوری سے جاری جنگ بندی کے خاتمے کے بعد رواں ہفتے شہادتوں کی تعداد میں اضافہ ہوا ہے۔

وزارت صحت نے گزشتہ 24 گھنٹوں کے دوران کم از کم 39 شہادتوں کی اطلاع دی ہے جس کے بعد منگل کو اسرائیل کی جانب سے فلسطینی علاقے میں آپریشن دوبارہ شروع کرنے کے بعد شہید ہونے والوں کی مجموعی تعداد 673 ہوگئی ہے۔

برطانوی طبی جریدے دی لانسیٹ میں جنوری کے اوائل میں شائع ہونے والی ایک تحقیق میں اندازہ لگایا گیا تھا کہ لڑائی کے پہلے نو ماہ کے دوران غزہ میں لڑائی کی وجہ سے شہادتوں کی تعداد غزہ کی وزارت صحت کے اعداد و شمار سے تقریباً 40 فیصد زیادہ تھی۔

وزارت صحت کا کہنا ہے کہ اس کے تازہ ترین اعداد و شمار میں 233 ایسے افراد بھی شامل ہیں جنہیں پہلے لاپتہ سمجھا جاتا تھا جن کی شہادت کی تصدیق ہو چکی ہے۔