آرمی چیف کا بہاولپور کا دورہ، جدید فوجی اور تعلیمی سہولیات کا افتتاح

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے بہاولپور کینٹ کا دورہ کیا جہاں انہیں بہاولپور کور کی آپریشنل تیاریوں اور تربیتی پہلوؤں پر بریفنگ دی گئی۔

اپنے دورے کے دوران آرمی چیف نے سی ایم ایچ انسٹی ٹیوٹ آف میڈیکل سائنسز (سی آئی ایم ایس)، انووسٹا چولستان اور انٹیگریٹڈ کمبیٹ سمولیٹر ایرینا سمیت جدید ترین سہولیات کا افتتاح کیا جس کا مقصد طبی تعلیم، انفارمیشن ٹیکنالوجی اور جنگی تیاریوں کو فروغ دینا ہے۔

آئی ایس پی آر کی جانب سے جاری بیان کے مطابق جنرل عاصم منیر نے افسران اور جوانوں کی غیر متزلزل لگن، بلند حوصلے اور جنگی تیاریوں کو سراہا۔

انہوں نے اس بات پر زور دیا کہ سخت تربیت ایک فوجی کی پیشہ ورانہ ترقی کی بنیاد ہے اور جدید جنگ کے چیلنجوں پر قابو پانے میں پاک فوج کی پہچان بنی رہنی چاہیئے۔

نیا افتتاح شدہ سی آئی ایم ایس میڈیکل تعلیم کا مرکز بننے کے لیے تیار ہے، جبکہ انٹیگریٹڈ کامبیٹ سمیولیٹر ایرینا سپاہیوں کی تربیتی صلاحیتوں کو بڑھائے گا۔ انووسٹا چولستان، ایک اور اہم منصوبہ، اس خطے میں فوجی اور شہری ترقی کی حمایت کے لیے انفارمیشن ٹیکنالوجی کا فائدہ اٹھانے پر مرکوز ہے۔

بہاولپور کی مختلف یونیورسٹیوں کے طلباء سے گفتگو کے دوران آرمی چیف نے نوجوانوں کو بااختیار بنانے کے لئے فوج کے عزم کو اجاگر کیا۔

انہوں نے کہا کہ نوجوان پاکستان کا مستقبل ہیں اور یہ ضروری ہے کہ وہ قومی ترقی میں بامعنی کردار ادا کرنے کے لئے خود کو ضروری صلاحیتوں سے آراستہ کریں۔

جنرل منیر نے طلباء کی حوصلہ افزائی کی کہ وہ تعلیمی مہارت حاصل کریں اور انہوں نے ملک کے مستقبل کی تشکیل میں ان کی صلاحیتوں کو سراہا۔

قبل ازیں آرمی چیف کی آمد پر بہاولپور کور کے کمانڈر نے ان کا استقبال کیا۔