سیکیورٹیز اینڈ ایکسچینج کمیشن آف پاکستان (ایس ای سی پی) نے فیصلہ کیا ہے کہ نئی غیرلسٹڈ کمپنیوں کیلئے حصص صرف بک انٹری فارم میں جاری کرنے اور برقرار رکھنے کی لازمی شرط متعارف کرائی جائیگی۔
کارپوریٹ گورننس کو بہتر بنانے اور ڈیجیٹلائزیشن کے فروغ کے لیے، نئی شامل ہونے والی کمپنیوں کے لیے حصص کو بک انٹری فارم میں جاری کرنے اور برقرار رکھنے کی لازمی شرط متعارف کرائی جارہی ہے۔ یہ اقدام کمپنیز ایکٹ 2017 کے سیکشن 72 کے تحت کیا گیا ہے اور اس کا اطلاق 3 مارچ 2025 سے ہوگا۔
یہ منتقلی فزیکل شیئرز سے جڑے اہم مسائل، جیسے شیئر ہولڈرز کے تنازعات، ریکارڈ کے انتظام میں عدم مؤثر طریقہ کار اور سیکیورٹی خدشات کو دور کرنے کے لیے متعارف کرائی گئی ہے۔
اس منتقلی کو آسان بنانے کیلئے ایس ای سی پی نے سینٹرل ڈپازٹری کے ساتھ تعاون کیا ہے تاکہ نئی شامل کمپنیوں کے لئے حصص کی شمولیت کے عمل کو نافذ کیا جاسکے جب کہ سی ڈی سی کی طرف سے متعلقہ قواعد و ضوابط میں ضروری ترامیم بھی کی گئی ہیں۔
3 مارچ 2025 سے نافذ العمل ہونے والے اس فیصلے کے تحت، تمام نئی قائم ہونے والی شیئر کیپیٹل رکھنے والی کمپنیاں اپنے حصص صرف بک انٹری فارم میں جاری اور برقرار رکھنے کی پابند ہوں گی۔ سبسکرائبرز کمپنی کے قیام کے وقت سینٹرل ڈپازٹری کے ساتھ ڈیجیٹل معاہدہ کریں گے، جس کے تحت شیئرز کو براہ راست سینٹرل ڈپازٹری سسٹم (سی ڈی ایس) میں کریڈٹ کیا جائے گا۔
کمپنی کے قیام پر ایس ای سی پی کمپنی اور شیئر ہولڈرز کی تفصیلات کو اے پی آئی انٹیگریشن کے ذریعے سینٹرل ڈپازٹری کو منتقل کرے گا، جس سے کمپنی اور اس کی سیکیورٹیز کو سینٹرل ڈپازٹری سسٹم (سی ڈی ایس) میں باآسانی شامل کیا جاسکے گا، جب کہ سبسکرائبرز کیلئے خودکار طور پر سمپلی فائیڈ انوسٹر اکاؤنٹس بھی کھول دیے جائیں گے۔
جیسے ہی شیئرز متعلقہ سی ڈی ایس اکاؤنٹس میں کریڈٹ کیے جائیں گے، سبسکرائبرز کو ای الرٹس کے ذریعے مطلع کردیا جائے گا۔
اس عمل کو مزید ہموار کرنے کیلئے ایس ای سی پی نے خودکار فیس وصولی، شمولیت کے وقت صارفین سے رضامندی حاصل کرنے اور ای زیڈ فائل پورٹل کے ذریعے آن لائن دستاویزات جمع کرانے کا آغاز کیا ہے ۔
یہ اقدام پاکستان کے کارپوریٹ سیکٹر کو جدید بنانے، شیئر ہولڈنگ ریکارڈ کو برقرار رکھنے میں زیادہ شفافیت، سلامتی اور کارکردگی کو یقینی بنانے میں ایک اہم قدم ہے۔
سیکیورٹیز کی ڈی میٹریلائزیشن کئی اہم فوائد پیش کرتی ہے جس میں شیئر ہولڈرز کے تنازعات کے ساتھ کھوئے ہوئے ، چوری ، یا خراب جسمانی حصص سے وابستہ خطرات ، پیچیدہ ، کاغذ پر مبنی حصص کی منتقلی کے عمل کو ختم کرنا وغیرہ شامل ہیں۔
ایس ای سی پی نے مزید کہا کہ یہ اقدام پاکستان کے کارپوریٹ سیکٹر میں شفافیت، عمل کو ڈیجیٹل بنانے کے لئے ٹیکنالوجی کے استعمال، سیکورٹی اور کاروبار میں آسانی کو فروغ دینے کے لئے ایس ای سی پی کے جاری عزم کے ساتھ مطابقت رکھتا ہے تاکہ شیئر ہولڈنگ مینجمنٹ کے لئے ایک محفوظ اور خودکار فریم ورک کو یقینی بنایا جاسکے۔
کاپی رائٹ بزنس ریکارڈر، 2025
Comments
Comments are closed.