ایف بی آر ٹیکس وصولی میں ایل ٹی او کراچی کا حصہ سب سے زیادہ

فیڈرل بورڈ آف ریونیو (ایف بی آر) کے مجموعی ٹیکس کلیکشن (انکم ٹیکس، سیلز ٹیکس اور فیڈرل ایکسائز ڈیوٹی) میں لارج ٹیکس پیئر آفس (ایل ٹی او) کراچی کا حصہ 24-2023 کے دوران سب سے زیادہ 30.74 فیصد رہا۔

مالی سال 24-2023 کے دوران ایف بی آر کی سالانہ کارکردگی پر ایک رپورٹ میں انکشاف کیا گیا ہے کہ ایف بی آر نے پاکستان میں مختلف ٹیکس دفاتر کی جانب سے مجموعی ٹیکس وصولی میں فیصد حصہ مرتب کیا ہے جس میں انکم ٹیکس، سیلز ٹیکس اور فیڈرل ایکسائز ڈیوٹی (ایف ای ڈی) شامل ہیں۔

ایل ٹی او کراچی 30.74 فیصد، ایل ٹی او لاہور 17.09 فیصد اور ایل ٹی او اسلام آباد 14.18 فیصد کے ساتھ تیسرے نمبر پر ہے۔ آر ٹی او لاہور اور ایل ٹی او ملتان بھی بالترتیب 4.7 فیصد اور 4.1 فیصد کے ساتھ نمایاں حصہ دار ہیں۔

مجموعی طور پر ان دفاتر کا کل ٹیکس وصولی میں 70.7 فیصد حصہ ہے، جو ان سرفہرست پانچ علاقوں کے اہم کردار کی نشاندہی کرتا ہے۔ بقیہ دفاتر مجموعی ٹیکس وصولی میں 29.3 فیصد کا حصہ ڈالتے ہیں۔

رپورٹ کے مطابق کراچی کے لارج ٹیکس آفس (ایل ٹی او) نے 2 ہزار 522 ارب روپے ٹیکس جمع کیے جن میں انکم ٹیکس کی مد میں 1 ہزار 360 ارب روپے، فیڈرل ایکسائز ڈیوٹی کی مد میں 13 کروڑ 63 لاکھ روپے اور سیلز ٹیکس کی مد میں ایک ہزار ارب روپے سے زائد شامل ہیں۔

لاہور کا ایل ٹی او 1402 ارب روپے سے زائد ٹیکس وصولیوں کے ساتھ دوسرے نمبر پر رہا جبکہ اسلام آباد کا ایل ٹی او 1164 ارب روپے کے ساتھ تیسرے نمبر پر رہا۔ اعداد و شمار نے پاکستان بھر میں متعلقہ ٹیکس دفاتر کے دائرہ اختیار میں رجسٹرڈ انکم ٹیکس ٹیکس دہندگان کی تعداد میں نمایاں اضافے کو اجاگر کیا۔ یہ بات خوش آئند ہے کہ 3.574 ملین ٹیکس دہندگان کے اضافے سے رجسٹرڈ ٹیکس دہندگان کی تعداد میں 36.2 فیصد کا اضافہ ہوا ہے۔

آر ٹی او ملتان 59.212 فیصد اضافے کے ساتھ سرفہرست ہے، اس کے بعد آر ٹی او بہاولپور اور آر ٹی او ساہیوال ہیں۔

انکم ٹیکس کے لیے رجسٹرڈ ٹیکس دہندگان کی تعداد میں اضافے کے حوالے سے چاروں صوبوں کو ٹاپ 10 ریجنز میں نمائندگی حاصل ہے۔ تاہم کچھ دفاتر ٹیکس دہندگان کی تعداد میں 10 فیصد سے بھی کم اضافہ دکھاسکے۔ سیلز ٹیکس کے معاملے میں پاکستان بھر میں متعلقہ ٹیکس دفاتر کے دائرہ اختیار میں رجسٹرڈ سیلز ٹیکس ٹیکس دہندگان میں نمایاں اضافہ ہوا ہے۔ خوش آئند بات یہ ہے کہ 30,297 نئے ٹیکس دہندگان کے اضافے سے رجسٹرڈ ٹیکس دہندگان کی تعداد میں 8.3 فیصد کا اضافہ ہوا ہے۔

کاپی رائٹ بزنس ریکارڈر، 2025