اپیل کورٹ نے نومنتخب امریکی صدر ٹرمپ کے خلاف کروڑوں ڈالر کا فیصلہ برقرار رکھا

امریکا کی وفاقی اپیل عدالت نے جیوری کے اس فیصلے کو برقرار رکھا ہے جس میں نو منتخب صدر ڈونلڈ ٹرمپ کو مصنف ای جین کیرول کو جنسی زیادتی اور بدنام کرنے کے جرم میں 50 لاکھ ڈالر ادا کرنے کا حکم دیا گیا تھا۔

نیو یارک کی جیوری نے گزشتہ سال 9 روزہ سول ٹرائل کے بعد پایا تھا کہ سابق صدر نے 1996 میں مین ہیٹن کے ڈپارٹمنٹ اسٹور میں کیرول کے ساتھ جنسی زیادتی کی تھی۔

ٹرمپ کو جنسی استحصال پر 20 لاکھ ڈالر اور ایلی میگزین کے سابق کالم نگار کیرول کو بدنام کرنے پر 30 لاکھ ڈالر ادا کرنے کا حکم دیا گیا تھا۔

ٹرمپ نے ان الزامات کی تردید کی اور اس بنیاد پر فیصلے کے خلاف اپیل کی کہ دو دیگر خواتین جنہوں نے کہا تھا کہ ٹرمپ نے ان کے ساتھ جنسی زیادتی کی تھی انہیں بھی گواہی دینے کی اجازت نہیں دی جانی چاہیے تھی۔

دوسری یو ایس سرکٹ کورٹ آف اپیلز کے تین رکنی پینل نے اس سے اتفاق نہیں کیا۔

ان کا کہنا تھا کہ ’ہم اس نتیجے پر پہنچے ہیں کہ مسٹر ٹرمپ نے یہ ثابت نہیں کیا کہ ضلعی عدالت نے چیلنج کیے گئے کسی بھی فیصلے میں غلطی کی ہے۔‘

مزید برآں، انہوں نے یہ ظاہر کرنے کے لیے اپنا بوجھ نہیں اٹھایا کہ کسی بھی دعویٰ کردہ غلطی یا دعویٰ کردہ غلطیوں کے امتزاج نے ان کے اہم حقوق کو متاثر کیا ہے جیسا کہ نئے ٹرائل کی ضرورت ہے۔

کیرول کو ایک اور جیوری نے ٹرمپ کے خلاف ایک الگ مقدمے میں 83 ملین ڈالر کا انعام دیا تھا۔ انہوں نے اس فیصلے کے خلاف بھی اپیل کی ہے۔

پانچ نومبر کو ہونے والے صدارتی انتخابات میں کامیابی کے بعد سے خصوصی وکیل جیک اسمتھ کی جانب سے ٹرمپ کے خلاف دائر کیے گئے دو وفاقی مقدمات کو مسترد کر دیا گیا ہے۔

ڈونلڈ ٹرمپ پر وائٹ ہاؤس چھوڑنے کے بعد خفیہ دستاویزات کو غلط طریقے سے استعمال کرنے اور 2020 کے انتخابات کے نتائج کو تبدیل کرنے کی کوشش کرنے کا الزام عائد کیا گیا تھا، لیکن خصوصی وکیل جیک اسمتھ نے محکمہ انصاف کی پالیسی کے تحت یہ مقدمات بند کر دیے، جس کے مطابق کسی موجودہ صدر کے خلاف مقدمہ چلانے کی کارروائی نہیں کی جاتی۔

ڈونلڈ ٹرمپ کو مئی میں نیو یارک میں 34 الزامات میں مجرم قرار دیا گیا تھا، جن میں کاروباری ریکارڈز کو جعلسازی سے تبدیل کرنا شامل تھا تاکہ پورن اسٹار اسٹورمی ڈینیئلز کو خاموش رہنے کی رقم کی ادائیگی کو چھپایا جا سکے۔

جج جوآن مرچن نے حال ہی میں منتخب صدر ڈونلڈ ٹرمپ کی جانب سے اپنی سزا کو منسوخ کرنے کی درخواست مسترد کر دی لیکن سزا کا اعلان غیر معینہ مدت کے لیے ملتوی کر دیا ہے۔