سوکی کناری ہائیڈرو پاور پراجیکٹ، افتتاحی تقریب سی او ڈی کی تکمیل تک ملتوی ہونے کا امکان

نجی پاور اینڈ انفرااسٹرکچر بورڈ (پی پی آئی بی) نے تجویز دی ہے کہ 884 میگاواٹ کے سوکی کناری ہائیڈرو پاور پراجیکٹ کا افتتاح کمرشل آپریشن ڈیٹ (سی او ڈی) کے حصول تک ملتوی کردیا جائے۔

پروجیکٹ کمپنی نے 6 ستمبر 2024 کو ایک ای میل کے ذریعے آگاہ کیا کہ پاور پرچیز ایگریمنٹ (پی پی اے) کے سیکشن 8.3 کے تحت سوکی کناری ہائیڈرو پاور پروجیکٹ کے لئے ریلائیبلٹی رن ٹیسٹ (آر آر ٹی) 30 اگست 2024 کو شروع ہوا تھا۔

آر آر ٹی کو مسلسل 168 گھنٹے (7 دن) چلانے کی ضرورت ہوتی ہے جس کے ذریعے کمرشل آپریشن کی تاریخ حاصل ہوتی ہے ، تاہم ، ٹیسٹنگ کے 7 ویں دن ، بجلی پیدا کرنے والے چار یونٹوں میں سے ایک ٹرپ کرگیا اور اس طرح آر آر ٹی کو روک دیا گیا۔ نتیجتا ، آر آر ٹی کامیابی سے مکمل نہیں ہوسکا۔

کمپنی نے نوٹ کیا کہ آر آر ٹی ٹیسٹ اسی دن ، 6 ستمبر 2024 کو دوبارہ شروع ہوا ، اور جمعہ 13 ستمبر ، 2024 تک ختم ہونے کی توقع ہے۔

مزید برآں کمپنی نے وزیر اعظم شہباز شریف کی جانب سے 12 ستمبر 2024 کو منصوبے کی افتتاحی تقریب کے حوالے سے رہنمائی کی درخواست کی۔ کمپنی نے مزید نوٹ کیا کہ اس کی سینئر قیادت پہلے ہی بیجنگ سے آنا شروع ہو چکی ہے۔

پس منظر کی وضاحت کے بعد منیجنگ ڈائریکٹر پی پی آئی بی شاہ جہاں مرزا نے تجویز پیش کی کہ 12 ستمبر 2024 کو ہونے والی منصوبے کی افتتاحی تقریب سی او ڈی کے حصول تک ملتوی کی جاسکتی ہے۔ پی پی آئی بی کے منیجنگ ڈائریکٹر نے پاور ڈویژن کو تجویز پیش کی کہ وہ وزیراعظم آفس سے رابطہ کریں تاکہ افتتاحی تقریب کو اس کے مطابق ری شیڈول کیا جا سکے۔

کاپی رائٹ بزنس ریکارڈر، 2024