چینی وفد کی آمد، وزارت منصوبہ بندی نے اپنی ترجیحات کو حتمی شکل دیدی

باخبر ذرائع نے بزنس ریکارڈر کو بتایا کہ وزارت منصوبہ بندی، ترقی اور خصوصی اقدامات (ایم پی ڈی اینڈ ایس آئی) نے اپنی ترجیحات کی فہرست کو حتمی شکل دے دی ہے جس پر اگلے ہفتےآنے والے چینی ماہرین کے وفد کے ساتھ تبادلہ خیال کیا جائے گا۔

وزیر اعظم کی منظوری سے وفد کو ریاستی مہمان قرار دیا جائے گا۔ وفد کی 3 اگست 2024 کو وزیراعلیٰ خیبر پختونخوا سے بھی ملاقات متوقع ہے۔

وفاقی وزیر برائے منصوبہ بندی، ترقی و خصوصی اقدامات احسن اقبال نے وزارت داخلہ کو ہدایت کی ہے کہ وہ پاکستان میں اپنے پورے پروگرام کے دوران ماہرین کے لیے ضروری حفاظتی انتظامات کریں۔ وزارت داخلہ خیبر پختونخوا اور بلوچستان کے شیڈول دوروں کے دوران سیکیورٹی انتظامات کے لیے صوبائی حکومتوں کے ساتھ بھی تعاون کرے گی۔

ذرائع کے مطابق وزارت داخلہ چینی وفد کے لیے 5 اگست کو کراچی سے گوادر جانے اور 6 اگست 2024 کو وطن واپسی کے لیے چارٹرڈ پروازوں کے انتظامات کرنے کے لیے وزارت دفاع کے ساتھ رابطے میں ہے۔

وزارت تجارت 2 اگست 2024 کو پہلی ششماہی میں کان کنی، زراعت، ٹیکسٹائل، فارماسیوٹیکل وغیرہ سمیت برآمدی شعبوں میں چیمبرز آف کامرس اینڈ انڈسٹری، ایسوسی ایشنز کے ساتھ وفد کی میٹنگ کا اہتمام کرے گی۔

ذرائع نے بتایا کہ وزارت تجارت 2 اگست 2024 کی سہ پہر میں تقریبا 10 معروف پاکستانی کاروباری اداروں (مثال کے طور پر زراعت، مینوفیکچرنگ، خدمات اور دیگر) کے ساتھ وفد کی ملاقات کا بھی اہتمام کرے گی۔ وزیر منصوبہ بندی نے سرمایہ کاری بورڈ (بی او آئی) کو ہدایت کی ہے کہ 3 اگست 2024 کو وفد کے دورہ پشکئی ایس ای زیڈ کے لئے ضروری انتظامات کو یقینی بنایا جائے۔

انہوں نے وزارت بحری امور کو حکومت بلوچستان کے ساتھ مل کر گوادر کے دورے کے تمام ضروری انتظامات کرنے کی ہدایت کی۔

انہوں نے اس بات پر بھی زور دیا کہ سیکرٹری وزارت بحری امور کو ذاتی طور پر گوادر میں ہونے والے اجلاسوں میں شرکت کرنی چاہیے۔

اجلاس کو آگاہ کیا گیا کہ متعلقہ وزارتوں کے سیکٹرل گروپس کے ساتھ 31 جولائی 2024 اور 4 اگست 2024 کو اجلاس منعقد ہوں گے۔ (i) وزارت تجارت (کنوینر)، صنعت و پیداوار اور بی او آئی؛ (2) وزارت توانائی و بجلی ڈویژن (کنوینر)، پیٹرولیم ڈویژن، پی پی آئی بی، جیولوجیکل سروے آف پاکستان، وزارت آبی وسائل اور گلگت بلتستان حکومت کے پانی و بجلی کے محکمے؛ (iii) وزارت نیشنل فوڈ سیکورٹی اینڈ ریسرچ (کنوینر) اور پی اے آر سی؛ (iv) وزارت انفارمیشن ٹیکنالوجی (کنوینر) اور وزارت سائنس و ٹیکنالوجی؛ (5) وزارت مواصلات (کنوینر)، نیشنل ہائی ویز اتھارٹی، وزارت ریلوے، وزارت میری ٹائم افیئرز اور گوادر پورٹ اتھارٹی؛ اور (6) وزارت ریلوے (کنوینر)۔

چیئرمین نے ہدایت کی کہ تمام وزارتیں/ ڈویژن اپنے اپنے مقاصد/ ایجنڈے کو واضح طور پر بیان کریں اور وفد کے ساتھ ملاقاتیں طے کریں اور اسے سی پیک سیکریٹریٹ کے ساتھ شیئر کریں۔