صدر زرداری نے فنانس بل کی منظوری دیدی

صدر آصف علی زرداری نے اتوار کو وزیر اعظم شہباز شریف کی ایڈوائس پر فنانس بل 2024 کی منظوری دے دی۔

صدر کے سیکرٹریٹ پریس ونگ کی ایک پریس ریلیز کے مطابق، فنانس بل یکم جولائی 2024 سے نافذ العمل ہوگا۔

28 جون کو، قومی اسمبلی نے یکم جولائی 2024 سے شروع ہونے والے مالی سال کے لیے مالیاتی تجاویز کو اپناتے ہوئے، بعض ترامیم کے ساتھ فنانس بل، 2024 منظور کیا تھا۔

فنانس بل 2024 میں مجوزہ ترامیم نان فائلرز، ویلتھ سٹیٹمنٹس، غیر ملکی اثاثوں اور ود ہولڈنگ ٹیکس کی دفعات سے متعلق ہیں۔

حکومت نے سینیٹ کی فنانس کمیٹی کی سفارش پر نان فائلرز کو بیرون ملک جانے سے قبل ٹیکس گوشوارے جمع کرانے کا موقع دینے کا فیصلہ کیا ہے۔ اس سے قبل ایف بی آر نے بل میں تجویز دی تھی کہ نان فائلرز کو بیرون ملک جانے کی اجازت نہیں ہوگی۔

فنانس بل میں مجوزہ ترمیم میں وضاحت شامل کی گئی ہے کہ “شکوک و شبہات کو دور کرنے کے لئے یہ واضح کیا جاتا ہے کہ ٹیکس قوانین (ترمیمی) ایکٹ، 2024 کے نفاذ کی تاریخ کے بعد موصول ہونے والے کمشنر (اپیلز) کے حکم کے خلاف ریفرنس، جہاں تشخیص کی قیمت یا، جیسا بھی معاملہ ہو، ٹیکس کی واپسی بیس کروڑ روپے سے زیادہ ہے، مذکورہ ایکٹ کے نفاذ کی تاریخ سے پہلے زیر التوا کارروائی کے باوجود ہائی کورٹ کے سامنے پیش ہوں گے۔

پاکستان کی پارلیمنٹ نے عالمی مالیاتی فنڈ (آئی ایم ایف) کے ساتھ نئے بیل آؤٹ پیکج پر مزید بات چیت سے قبل آئندہ مالی سال کے لئے حکومت کا بھاری ٹیکس والا فنانس بل منظور کرلیا ہے کیونکہ اس کا مقصد سست رفتار سے ترقی کرنے والی معیشت کے لیے قرض کے ڈیفالٹ کو روکنے کی کوشش کرنا ہے۔

حکومت نے دو ہفتے قبل بھاری ٹیکس پر مشتمل بجٹ پیش کیا تھا جس پر حزب اختلاف کی جماعتوں اور دیگر کاروباری اداروں کی جانب سے شدید تنقید کی گئی تھی جنہوں نے بڑھتے ہوئے حکومتی اخراجات اور معاشی ترقی کے لیے کم مالی گنجائش پر تشویش کا اظہار کیا تھا۔

وزیر خزانہ محمد اورنگزیب نے فنانس بل پارلیمنٹ میں پیش کیا جسے وزیر اعظم شہباز شریف کی قیادت میں حکمران اتحاد نے منظور کیا۔ پاکستان مسلم لیگ (ن) نے اس ہفتے کے اوائل میں بجٹ کیلئے اپنی حمایت کا اعلان کیا تھا ، جس سے قبل اسکی اتحادی جماعت پاکستان پیپلز پارٹی نے بجٹ کے کچھ اقدامات سے اختلاف کا اظہار کیا تھا۔

پالیسی سازوں نے یکم جولائی سے شروع ہونے والے مالی سال کے لئے 13 ٹریلین روپے (46.66 بلین ڈالر) کا چیلنجنگ ٹیکس ریونیو ہدف مقرر کیا ہے، جو رواں سال کے مقابلے میں تقریبا 40 فیصد زیادہ ہے۔

بجٹ آئی ایم ایف کو آن بورڈ لینے کی طرف ایک اہم قدم ہے، جو پاکستان کے ساتھ 6 بلین ڈالر سے 8 بلین ڈالر کے ممکنہ قرض پروگرام کے لیے مصروف عمل ہے۔

ٹیکس ہدف میں اضافہ رواں سال کے نظرثانی شدہ تخمینوں کے مقابلے براہ راست ٹیکسوں میں 48 فیصد اور بالواسطہ ٹیکسوں میں 35 فیصد اضافے پر مشتمل ہے۔

پیٹرولیم لیوی سمیت نان ٹیکس ریونیو میں 64 فیصد اضافہ کیا جا رہا ہے۔

ٹیکسٹائل اور چمڑے کی مصنوعات کے ساتھ ساتھ موبائل فونز پر ٹیکس 18 فیصد تک بڑھ جائے گا اس کے علاوہ رئیل اسٹیٹ سے حاصل ہونے والے کیپیٹل گین پر ٹیکس میں اضافہ ہوگا۔ مزدوروں کو بھی آمدنی پر براہ راست ٹیکس کا سامنا کرنا پڑے گا۔

اپوزیشن جماعتوں، خاص طور پر جیل میں بند سابق وزیراعظم عمران خان کے حمایت یافتہ ارکان پارلیمنٹ نے بجٹ کو یہ کہتے ہوئے مسترد کر دیا کہ یہ انتہائی مہنگائی کا باعث ہوگا۔