وفاقی کابینہ کا پی آئی اے کی نجکاری میں شفافیت پر زور

وفاقی کابینہ نے افغان مہاجرین کے لیے پروف آف رجسٹریشن (پی او آر) کارڈز کی مدت میں 30 جون تک توسیع کی مںظوری دے دی اور وزارت نجکاری کو پاکستان انٹرنیشنل ایئرلائنز (پی آئی اے) کی نجکاری میں شفافیت کو اولین ترجیح دینے کی ہدایت دی۔

وزیراعظم شہباز شریف کی زیر صدارت وفاقی کابینہ کے اجلاس میں سیکرٹری نجکاری نے پی آئی اے کی نجکاری سے متعلق پیش رفت کے حوالے سے آگاہ کیا۔

سیکرٹری نجکاری نے کابینہ کو بتایا کہ اسے حوالے سے 2 اپریل کو قومی و بین الاقوامی اخبارات میں اظہارِ دلچسپی کی دعوت کے اشتہارات شائع ہوچکے ہیں جن کی آخری تاریخ 3 مئی ہے اور اب تک متعدد کمپنیوں نے پی آئی اے کی نجکاری میں گہری دلچسپی کا اظہار کیا ہے۔

وفاقی کابینہ نے پی آئی اے کی نجکاری میں شفافیت کے عنصر کو بنیادی اہمیت دینے کی ہدایت جاری کردی۔

کابینہ نے سیکریٹری ایوی ایشن سے پاکستان کے ہوائی اڈوں خصوصاً لاہور اور کراچی میں سہولتوں کی بہتری کے حالیہ اقدامات پر بریفنگ لی ۔ کابینہ کو بتایا گیا کہ ہوائی اڈوں پر سروس کاؤنٹرز میں اضافہ کیا گیا ہے اور سہولتوں کی مزید بہتری پر کام جاری ہے۔

مزید برآں، اسٹیٹ آف فرنٹیئر ریجنز ڈویژن کی سفارش پر وفاقی کابینہ نے افغان مہاجرین کے پی او آر کارڈز کی میعاد یکم اپریل 2024 سے 30 جون 2024 تک بڑھانے کی بھی منظوری دی۔

کابینہ کو بتایا گیا کہ اس توسیع سے پی او آر کارڈ ہولڈرز پاکستان میں اسکولوں، بینک اکاؤنٹس اور دیگر سہولتوں سے فائدہ اٹھا سکیں گے ۔ ان پی او آر کارڈ ہولڈرز کو غیر قانونی طور پر پاکستان میں مقیم غیر ملکی باشندوں کو وطن واپس کرنے کے پروگرام کے تیسرے مرحلے میں اپنے وطن واپس بھیجا جائے گا جب کہ بغیر کسی شناختی کاغذات کے پاکستان میں مقیم غیر ملکی باشندوں کو وطن واپس بھیجنے کا پہلا مرحلہ جاری ہے۔

وزارت قانون و انصاف کی سفارش پر وفاقی کابینہ نے صوبہ بلوچستان میں انسداد منشیات کے مقدمات نمٹانے کے لیے مکران ڈویژن میں اضافی خصوصی عدالت کے قیام کی منظوری دی۔

خصوصی عدالت کا دائرہ اختیار پنجگور، کیچ، گوادر، حب اور لسبیلہ کے اضلاع تک ہوگا۔

کابینہ نے ہدایت کی کہ خصوصی عدالت میں اچھی شہرت کے حامل ججوں کی تقرری کی جائے اور استغاثہ کے عمل کو مزید موثر بنایا جائے۔

وفاقی کابینہ کو یہ بھی بتایا گیا کہ زرعی شعبے میں ڈرون ٹیکنالوجی کے استعمال کے لیے ڈرون پالیسی کے حوالے سے تمام اسٹیک ہولڈرز سے مشاورت آخری مراحل میں ہے جسے جلد منظوری کے لیے کابینہ میں پیش کیا جائے گا۔

وفاقی کابینہ نے انسٹی ٹیوٹ آف کاسٹ اینڈ مینجمنٹ اکاؤنٹنٹس آف پاکستان کے بورڈ کے چار سابقہ ​​ممبران کی تقرری کی منظوری دی۔

اجلاس نے 18 اپریل 2024 کو کابینہ کمیٹی برائے قانون سازی کے مقدمات کے اجلاس میں کیے گئے فیصلوں کی بھی منظوری دی۔

کاپی رائٹ بزنس ریکارڈر، 2024