ایران جنگ کے اہداف تقریباً حاصل کرلئے، امریکی صدر

امریکی صدر ڈونلڈ ٹرمپ نے بدھ کی شب قوم سے اپنے ٹیلی وژن خطاب میں کہا ہے کہ ایران کے خلاف جاری جنگ میں امریکی فوج اپنے طے شدہ اہداف کے قریب پہنچ چکی ہے اور یہ تنازع جلد اختتام پذیر ہو سکتا ہے۔ تاہم انہوں نے جنگ کے خاتمے کے لیے کوئی واضح ٹائم لائن دینے سے گریز کیا۔

صدر ٹرمپ، جو ایک جانب جنگ سے تھکی ہوئی امریکی عوام اور دوسری جانب گرتی ہوئی مقبولیت کا سامنا کر رہے ہیں، نے دعویٰ کیا کہ امریکہ ایران کی بحریہ اور فضائیہ کو تباہ کر چکا ہے جبکہ اس کے بیلسٹک میزائل اور جوہری پروگرام کو بھی شدید نقصان پہنچایا گیا ہے۔

انہوں نے مزید کہا کہ آئندہ دو سے تین ہفتوں کے دوران ایران میں اہداف کو نشانہ بنانے کا سلسلہ جاری رکھا جائے گا۔ ان کے بقول بنیادی اسٹرٹیجک مقاصد تقریباً مکمل ہو چکے ہیں اور امریکہ بہت جلد اپنے مشن کو مکمل کر لے گا۔

خطاب کے دوران امریکی صدر نے اعتراف کیا کہ امریکی عوام پیٹرول کی بڑھتی قیمتوں پر تشویش کا شکار ہیں، تاہم انہوں نے یقین دہانی کرائی کہ یہ اضافہ عارضی ہے اور جلد قیمتیں معمول پر آ جائیں گی۔ انہوں نے اس اضافے کا ذمہ دار ایران کو ٹھہراتے ہوئے کہا کہ ایرانی اقدامات، خاص طور پر خطے میں آئل ٹینکرز پر حملے، عالمی سپلائی میں خلل کا سبب بنے ہیں۔

ادھر ٹرمپ انتظامیہ کی جانب سے جنگ کے حوالے سے مختلف بیانات اور بدلتی ٹائم لائنز سامنے آتی رہی ہیں، جس سے اتحادی ممالک اور عوام میں بے چینی پائی جاتی ہے۔ امریکی صدر نے اپنے خطاب میں نیٹو کا براہ راست ذکر نہیں کیا، حالانکہ اس سے قبل وہ اس اتحاد کی حمایت نہ کرنے پر تنقید کر چکے ہیں۔