بھارت: اپوزیشن کے احتجاج میں ہزاروں افراد کی شرکت، چیف الیکشن کمشنر سے مستعفی ہونے کا مطالبہ

بھارت کے دارالحکومت نئی دہلی میں ہزاروں افراد نے ووٹر فہرستوں پر نظرثانی کے معاملے پر چیف الیکشن کمشنر سے استعفے کا مطالبہ کرتے ہوئے احتجاج کیا۔

یہ مظاہرے وزیراعظم نریندر مودی کے خلاف ایک ماہ سے زائد عرصے سے جاری اپوزیشن کے احتجاجی سلسلے کا حصہ ہیں۔

کانگریس رہنما راہول گاندھی کی قیادت میں مظاہرین کا الزام ہے کہ ووٹر فہرستوں میں تبدیلی سے مودی کی جماعت بھارتیہ جنتا پارٹی (بی جے پی) کو فائدہ پہنچایا جارہا ہے۔

مظاہرین کے مطابق ووٹر فہرستوں سے 13 کروڑ سے زائد نام خارج کیے گئے، تاہم الیکشن کمیشن کا کہنا ہے کہ اس اقدام کا مقصد جعلی اور نااہل ووٹرز کے نام حذف کرنا ہے۔ کمیشن نے کسی سیاسی جماعت کی حمایت کے الزام کو مسترد کرتے ہوئے کہا ہے کہ غلط طور پر خارج کیے گئے ووٹرز دوبارہ اندراج کراسکتے ہیں۔

راہول گاندھی نے احتجاجی ریلی سے خطاب کرتے ہوئے چیف الیکشن کمشنر گیانیش کمار سے عہدہ چھوڑنے کا مطالبہ کیا۔ ان کا کہنا تھا کہ ووٹر فہرستوں سے ناموں کا اخراج شہریوں کے حقِ رائے دہی اور اظہارِ رائے پر ڈاکا ہے۔

دوسری جانب بھارتی وزیر صحت جگت پرکاش نڈا نے احتجاج کو جمہوریت کے نام پر ملک میں انتشار پھیلانے کی سازش قرار دیا۔ حکومت نے اپوزیشن کے الزامات مسترد کرتے ہوئے کہا ہے کہ انتخابی عمل کو متنازع بنانے کی کوشش کی جارہی ہے۔