انٹربینک مارکیٹ: ڈالر کے مقابلے میں روپیہ مزید بہتر

انٹربینک مارکیٹ میں جمعہ کو بھی ڈالر کے مقابلے روپیہ مزید مضبوط ہوگیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 276.75 روپے پر بند ہوا۔

یاد رہے کہ جمعرات کو مقامی کرنسی 276.76 روپے پر بند ہوئی تھی۔

عالمی منڈی میں جمعہ کو جاپانی ین کی قدر مستحکم رہی جبکہ بینک آف جاپان کے مانیٹری پالیسی سے متعلق فیصلے سے قبل سرمایہ کاروں کی توجہ شرح سود پر مرکوز رہی۔ دوسری جانب اے آئی سے وابستہ حصص میں فروخت کی نئی لہر کے باعث سرمایہ کاروں نے محفوظ اثاثوں کا رخ کیا جس سے امریکی ٹریژری بانڈز کے منافع میں کمی کے ساتھ ڈالر بھی دباؤ میں رہا۔

توقع ہے کہ مہنگائی کے بلند دباؤ کے باوجود بینک آف جاپان شرح سود 1.25 فیصد پر برقرار رکھے گا۔ تاہم مرکزی بینک کی جانب سے سخت مانیٹری پالیسی کا عندیہ دیے جانے کا امکان ہے جبکہ مارکیٹ میں دسمبر میں شرح سود بڑھائے جانے کے امکانات تقریباً 80 فیصد ظاہر کیے جارہے ہیں۔

ین کی قدر میں معمولی کمی ہوئی اور یہ ڈالر کے مقابلے میں تقریباً 157.815 پر آگیا۔ رواں ماہ ڈالر کے مقابلے میں ین کی قدر میں 0.2 فیصد کمی کا امکان ہے۔

امریکی ڈالر انڈیکس 101.77 پر آگیا۔ تاہم رواں ماہ اس میں 0.3 فیصد اضافے کا امکان ہے، جو مسلسل دوسرا ماہانہ اضافہ ہوگا۔

محفوظ سرمایہ کاری کے اثاثوں کی طلب بڑھنے کے باعث امریکی ٹریژری بانڈز کے منافع میں کمی ڈالر پر دباؤ کا بنیادی سبب بنی۔

امریکی 10 سالہ ٹریژری نوٹ پر منافع کم ہوکر 4.8958 فیصد اور 30 سالہ بانڈ پر منافع گھٹ کر 5.2623 فیصد رہ گیا۔ دونوں بانڈز پر منافع ایک ماہ سے زائد عرصے کی کم ترین سطح پر آگیا۔