رونالڈو پر پرتگال کا کیمپ چھوڑنے پر 30 روزہ پابندی عائد، کوچ جیسس سے اختلافات

پرتگال فٹبال فیڈریشن نے اسٹار فٹبالر کرسٹیانو رونالڈو پر قومی ٹیم کا کیمپ چھوڑنے پر 30 روزہ پابندی عائد کردی۔ رونالڈو اور کوچ جارج جیسس کے درمیان ٹیم میں ان کے کردار پر اختلافات پیدا ہوگئے تھے۔

فیڈریشن کی ڈسپلنری کونسل نے 41 سالہ فارورڈ کے خلاف الزامات برقرار رکھتے ہوئے ان پر 255 یورو (285.83 ڈالر) جرمانہ بھی عائد کیا۔

رونالڈو نے رواں ماہ ناروے کے خلاف میچ میں متبادل کھلاڑی کی حیثیت سے میدان میں نہ اتارے جانے کے بعد کوچ جیسس پر اپنا وعدہ دو مرتبہ توڑنے کا الزام لگایا تھا۔ اس کے بعد وہ ڈنمارک کے خلاف نیشنز لیگ میچ سے قبل کوپن ہیگن میں پرتگالی ٹیم کا کیمپ چھوڑ کر چلے گئے۔

جیسس نے رونالڈو سے کسی معاہدے کی تردید کی لیکن پرتگال کی 2-1 سے کامیابی کے بعد ان کی ٹیم میں واپسی کا امکان کھلا رکھا۔ دوسری جانب رونالڈو نے ناروے کے خلاف میچ کے بعد شائقین کا شکریہ ادا نہ کرنے اور ساتھی کھلاڑیوں کو چھوڑ کر جانے پر معذرت کی تھی۔ انہوں نے کہا تھا کہ سزا پوری کرنے کے بعد وہ قومی ٹیم کے لیے دستیاب ہوں گے۔

فیڈریشن کی ڈسپلنری کونسل کے مطابق رونالڈو نے ضابطہ اخلاق کی متعلقہ شق کی دانستہ خلاف ورزی کی۔ ان کے خلاف کارروائی 9 اکتوبر کو شروع کی گئی تھی، جبکہ رپورٹ کردہ واقعہ دو روز پہلے پیش آیا تھا۔

فیڈریشن نے واضح نہیں کیا کہ پابندی کن میچوں یا سرگرمیوں پر لاگو ہوگی اور آیا عارضی پابندی کے دوران گزارا گیا وقت 30 روزہ سزا میں شمار کیا جائے گا یا نہیں۔ پرتگال فٹبال فیڈریشن کے صدر پیڈرو پروئنسا نے کہا ہے کہ معاملہ حل ہونے کے بعد فیڈریشن کے تمام افراد رونالڈو کی قومی ٹیم میں واپسی چاہتے ہیں۔