روسی آئل ریفائنریوں پر یوکرینی حملے، امریکی امن کوششوں کی نفی ہیں، کریملن

کریملن نے جمعرات کے روز کہا ہے کہ روسی آئل ریفائنریوں پر یوکرین کے حملے امریکی امن کوششوں کی روح کے منافی ہیں۔ اس کا یہ بیان روس کے علاقے ریازان میں ایک آئل ریفائنری پر رات گئے یوکرینی ڈرون حملے کے بعد سامنے آیا۔

امریکی صدر ڈونلڈ ٹرمپ نے اتوار کو توانائی کے شعبے پر حملوں کے حوالے سے جنگ بندی کا اعلان کیا تھا۔ یوکرین کا کہنا تھا کہ اسے اس اعلان کا علم پہلے ذرائع ابلاغ کی خبروں سے ہوا، جبکہ روس نے بھی عوامی سطح پر اس جنگ بندی کا پابند رہنے کا کوئی وعدہ نہیں کیا تھا۔

کیف نے کہا تھا کہ اس نے روسی آئل ریفائنریوں پر حملے تین روز کے لیے روک دیے تھے، تاہم روس کی جانب سے یوکرین کے توانائی کے شعبے پر حملے جاری رہنے کے بعد اس نے دوبارہ کارروائیاں شروع کردیں۔

کریملن کے ترجمان دمتری پیسکوف نے جمعرات کو صحافیوں سے گفتگو کرتے ہوئے کہا کہ ماسکو کے نزدیک کیف نے کبھی جنگ بندی کی پابندی نہیں کی۔ ان کا کہنا تھا کہ روس کی ایک اور آئل ریفائنری کو نشانہ بنایا جانا ’’کوئی نئی بات نہیں‘‘۔

پیسکوف نے کہا ہے کہ ’’کیف میں یوکرینی حکومت ان تنصیبات کو مسلسل نشانہ بنا رہی ہے، جس کے نتیجے میں وہ یقیناً امریکا کی امن کوششوں اور امریکی مذاکرات کاروں کی کاوشوں سے براہِ راست متصادم ہو رہی ہے۔ امریکی مذاکرات کار امن عمل شروع کرنے کے لیے واقعی بھرپور کوششیں کر رہے ہیں، لیکن اب تک ان کوششوں کو کیف حکومت اور بالخصوص صدر (وولودیمیر) زیلنسکی کی جانب سے امن کے لیے آمادہ نہ ہونے کے باعث ناکامی کا سامنا کرنا پڑا ہے۔‘‘

روس اس سے قبل بھی یہ موقف اختیار کرچکا ہے کہ جنگ بندی کے دائرۂ کار کا تعین نہیں کیا گیا تھا۔ روس نے بدھ کے روز کہا ہے کہ اس نے یوکرین کے توانائی کے بنیادی ڈھانچے کی سات تنصیبات کو نشانہ بنایا ہے۔