صومالی فورسز نے ہائی جیک کیا گیا آئل ٹینکر بازیاب کرالیا

صومالیہ کی پونٹ لینڈ سیکیورٹی فورسز نے پٹرولیم مصنوعات لے جانے والے ٹینکر ایم ٹی آنر 25 کو بازیاب کرالیا ہے۔ پونٹ لینڈ کے سرکاری ٹیلی ویژن نے منگل کو بتایا کہ پالاؤ کے پرچم بردار اس ٹینکر کو اپریل میں صومالی قزاقوں نے قبضے میں لے لیا تھا جس کے عملے کے 17 ارکان میں کم از کم 10 پاکستانی شامل تھے۔

براڈکاسٹر نے بتایا کہ جہاز کو یرغمال بنائے رکھنے والے قزاقوں کو گرفتار کرلیا گیا ہے اور انہیں عدالت میں پیش کیا جائے گا۔

پونٹ لینڈ کے حکام نے تبصرے کے لیے کی گئی درخواستوں کا جواب نہیں دیا۔

آنر 25 کو 21 اپریل کو پونٹ لینڈ کے ساحل سے تقریباً 30 ناٹیکل میل دور سے قبضے میں لیا گیا تھا۔ اس وقت جہاز پر عملے کے 17 ارکان سوار تھے جن میں کم از کم 10 پاکستانی شامل تھے۔

یہ کارروائی گزشتہ ہفتے پونٹ لینڈ کی جانب سے قزاقی کے خلاف کی جانے والی ایک ایسی ہی کارروائی کے بعد عمل میں آئی ہے جب علاقائی میری ٹائم پولیس فورس نے بتایا تھا کہ اس نے امریکی پابندیوں کی زد میں آنے والے ٹینکر سیبو 1 کو بازیاب کرا لیا ہے جسے صومالی قزاقوں نے اگست میں اغوا کرلیا تھا۔