پنجگور اور چاغی میں سکیورٹی فورسز کی کارروائیاں، 11 دہشت گرد ہلاک ، سرکاری میڈیا
- آپریشن ردالفتنہ 3: سکیورٹی فورسز نے اسلحہ قبضے میں لے کر مذموم عزائم ناکام بنا دیے
سکیورٹی فورسز نے آپریشن ردالفتنہ تھری کے تحت بلوچستان میں ہدفی کارروائیوں کے دوران 11 دہشت گردوں کو ہلاک کردیا۔ سرکاری میڈیا ریڈیو پاکستان نے سکیورٹی ذرائع کے حوالے سے یہ اطلاع دی ہے۔
ذرائع کے مطابق پنجگور کے علاقے گوارگو میں کی گئی کارروائی کے دوران فتنۃ الہندوستان سے تعلق رکھنے والے پانچ دہشت گرد ہلاک کیے گئے۔ ان کے قبضے سے بڑی مقدار میں اسلحہ اور گولہ بارود بھی برآمد ہوا۔
ذرائع نے بتایا کہ چاغی کے علاقوں امین آباد اور سیاہ چنگ میں کی گئی الگ الگ کارروائیوں کے دوران مزید 6 دہشت گرد ہلاک ہوئے، جبکہ بڑی تعداد میں اسلحہ اور دھماکا خیز مواد بھی برآمد کیا گیا۔
وزیر داخلہ محسن نقوی نے پنجگور اور چاغی میں دہشت گردوں کے خلاف کامیاب کارروائیوں پر سکیورٹی فورسز کو خراج تحسین پیش کیا۔
وزارت داخلہ نے ایکس پر جاری بیان میں محسن نقوی کے حوالے سے کہا کہ سکیورٹی فورسز نے 11 دہشت گردوں کو ہلاک کرکے اور ان کے ’’مذموم عزائم‘‘ ناکام بنا کر اپنی پیشہ ورانہ صلاحیتوں کا مظاہرہ کیا۔
محسن نقوی نے آپریشن ردالفتنہ 3 میں حصہ لینے والے سکیورٹی اہلکاروں کو خراج تحسین پیش کرتے ہوئے کہا کہ ان کی کارروائیاں قومی سلامتی کے تحفظ کے لیے ریاست کے عزم کی عکاسی کرتی ہیں۔
انہوں نے کہا کہ دہشت گردی کے خلاف جنگ میں پوری قوم سکیورٹی فورسز کے شانہ بشانہ کھڑی ہے۔
Comments