آسٹریلیا کے خلاف سیریز سے قبل جنوبی افریقی ٹیم کا ایک اور فاسٹ بولر باہر

جنوبی افریقہ کو آسٹریلیا کے خلاف اگلے ہفتے سے شروع ہونے والی تین میچوں کی ون ڈے انٹرنیشنل سیریز سے قبل اپنے بولنگ اٹیک میں ایک اور انجری کا دھچکا لگا ہے اور لنگی نگیڈی سیریز سے باہر ہوگئے ہیں۔

کرکٹ جنوبی افریقہ نے بتایا کہ نگیڈی رواں ہفتے ڈومیسٹک فرسٹ کلاس میچ کے دوران دائیں ران کے پٹھے کی انجری کا شکار ہوئے، جس کے باعث وہ سیریز میں حصہ نہیں لے سکیں گے۔

کرکٹ جنوبی افریقہ نے جمعہ کو جاری بیان میں کہا، ’’بدھ کو کیے گئے اسکینز کے بعد وہ بحالی کے مرحلے سے گزریں گے۔‘‘

کگیسو ربادا اور اوٹنیل بارٹمین بھی پہلے ہی ران کے پٹھوں کی انجریز کے باعث سیریز سے باہر ہو چکے ہیں، جس سے میزبان ٹیم کو بولنگ اٹیک میں ایک اور نقصان کا سامنا ہے۔

20 سالہ فاسٹ بولر نکوپانی موکوینا، جنہوں نے گزشتہ ہفتے نمیبیا کے خلاف ون ڈے انٹرنیشنل ڈیبیو کیا تھا، کو نگیڈی کے متبادل کے طور پر اسکواڈ میں طلب کر لیا گیا ہے۔

کگیسو ربادا کے متبادل کے طور پر جیرالڈ کوئٹزی کی تقریباً تین سال بعد پہلی بار جنوبی افریقہ کے ون ڈے اسکواڈ میں واپسی ہوئی ہے، جبکہ اوٹنیل بارٹمین کی جگہ ڈوان جانسن کو اسکواڈ میں شامل کر لیا گیا ہے۔

جنوبی افریقہ اور آسٹریلیا کے درمیان ون ڈے سیریز کا آغاز جمعرات، 24 ستمبر کو ڈربن میں ہوگا۔ اس کے بعد اکتوبر میں دونوں ٹیموں کے درمیان تین ٹیسٹ میچوں کی سیریز کھیلی جائے گی۔