روس کا بیلسٹک میزائلوں سے یوکرین پر حملہ، 5 افراد ہلاک،2 درجن سے زائد زخمی

روسی بیلسٹک میزائلوں نے جمعرات کی صبح یوکرین کے دارالحکومت کیف کو نشانہ بنایا، جس کے نتیجے میں کم از کم 5 افراد ہلاک اور 2 درجن سے زائد زخمی ہوگئے۔ حکام نے ٹیلی گرام پر جاری بیانات میں بتایا کہ حملوں سے متعدد عمارتوں کو نقصان پہنچا اور دارالحکومت کے بعض علاقوں میں بجلی کی فراہمی معطل ہوگئی۔

کیف کے میئر وٹالی کلیچکو کے مطابق ایک رہائشی عمارت میں لوگ پھنس گئے، جبکہ شہر کے مختلف مقامات پر آگ بھڑک اٹھی۔ غیر رہائشی عمارتوں، گوداموں اور بچوں کے ایک اسپتال کو بھی نقصان پہنچا۔

رائٹرز کے ایک عینی شاہد نے بتایا کہ اس نے ایک درجن سے زائد دھماکوں کی آوازیں سنیں۔ کیف کے اردگرد کے علاقے میں بھی ایک شخص کے ہلاک ہونے کی اطلاع دی گئی۔

یوکرین کی ایمرجنسی سروس نے رات کے حملوں کے بعد تباہ شدہ عمارتوں میں امدادی کارروائیوں اور آگ بجھانے کی ویڈیوز جاری کیں۔

روس اور یوکرین کے درمیان فروری 2022 میں روسی حملے کے آغاز کے بعد سے تقریباً روزانہ حملوں کا تبادلہ جاری ہے، جبکہ امریکا اور یورپ کی سفارتی کوششیں اب تک مستقل جنگ بندی کرانے میں ناکام رہی ہیں۔

ادھر یوکرین کی سرحد سے متصل نیٹو اور یورپی یونین کے رکن ملک پولینڈ نے اپنی فضائی حدود کے تحفظ کے لیے دفاعی فضائی کارروائیاں شروع کردی ہیں۔