بلوچستان : مختلف علاقوں میں سیکیورٹی فورسز کی کارروائیاں، 9 دہشتگرد ہلاک

سکیورٹی فورسز نے بلوچستان کے مختلف علاقوں میں دہشتگردوں کیخلاف انٹیلی جنس بیسڈ آپریشنز میں 9 سے زائد دہشت گردوں کو ہلاک کردیا۔

سرکاری میڈیا پی ٹی وی نیوز کے مطابق کارروائیوں کے دوران فوجی دستوں نے زیارت اور ہرنائی کے پہاڑی علاقوں جبکہ ضلع سوراب میں دہشت گردوں کے ٹھکانوں کو مؤثر انداز میں نشانہ بنایا جس کے نتیجے میں دہشت گردوں کی متعدد پناہ گاہیں تباہ ہوئیں اور بڑی مقدار میں اسلحہ برآمد کیا گیا۔

سکیورٹی ذرائع نے بتایا کہ فورسز نے ہرنائی اور زیارت میں دہشت گردوں کے ٹھکانوں پر درست اور مؤثر کارروائیاں کیں جن کے نتیجے میں بیشتر دہشت گرد ہلاک ہوگئے اور ان کا آپریشنل ڈھانچہ تباہ کردیا گیا۔

اسی دوران ضلع سوراب میں ایک کارروائی کے نتیجے میں مزید ایک دہشت گرد ہلاک ہوگیا۔ کارروائیوں کے بعد سکیورٹی اہلکاروں نے ہلاک ہونے والے دہشت گردوں کے قبضے سے بڑی مقدار میں گولہ بارود، دستی بم اور فوجی سازوسامان برآمد کیا۔

متاثرہ علاقوں میں کلیئرنس آپریشن تاحال جاری ہے تاکہ باقی ماندہ خطرات کا مکمل خاتمہ یقینی بنایا جا سکے۔

حالیہ انٹیلی جنس بنیادوں پر کی جانے والی کارروائیاں گزشتہ روز بلوچستان کے کلی زائیک کے علاقے میں کامیاب فوجی کارروائی کے بعد کی گئی ہیں جہاں سکیورٹی فورسز نے دو دہشت گردوں کو ہلاک اور تین کو زخمی کردیا تھا۔

کلی زائیک میں ہونے والی کارروائی میں ہلاک ہونے والے دہشت گردوں میں سے ایک کی شناخت مشتاق احمد عرف کوہ یار کے نام سے ہوئی۔ سکیورٹی اہلکاروں نے اس کے قبضے سے اسلحہ، میگزین، دستی بم اور دھماکا خیز مواد برآمد کیا۔

وزیر داخلہ محسن نقوی نے کامیاب کارروائیوں اور سکیورٹی فورسز کی پیشہ ورانہ صلاحیتوں کو سراہا۔

.

سکیورٹی ذرائع کے حوالے سے آج نیوز نے رپورٹ کیا تھا کہ سکیورٹی فورسز نے 16 اگست کو بلوچستان کے ضلع خاران کے علاقے لَجّے میں انٹیلی جنس بنیادوں پر کی جانے والی کارروائی کے دوران فتنۃ الخوارج سے تعلق رکھنے والے 7 دہشت گردوں کو ہلاک اور متعدد کو زخمی کردیا۔

ذرائع کے مطابق علاقے میں دہشت گردوں کی موجودگی سے متعلق انٹیلی جنس اطلاعات موصول ہونے کے بعد کارروائی شروع کی گئی۔ کارروائی کے دوران 7 دہشت گرد ہلاک جبکہ متعدد دیگر زخمی ہوئے۔