امریکی صدر ٹرمپ نے مکہ دفاعی معاہدے کو جرأت مندانہ اور اہم پہلا قدم قرار دیدیا

امریکی صدر ڈونلڈ ٹرمپ نے پاکستان، سعودی عرب اور ترکیہ کے درمیان حال ہی میں طے پانے والے دفاعی معاہدے پر خوشی کا اظہار کیا۔

امریکی صدر نے اپنے سوشل میڈیا پلیٹ فارم ٹروتھ سوشل پر ایک پوسٹ میں لکھا کہ مجھے یہ دیکھ کر بہت خوشی ہوئی کہ سعودی عرب، ترکیہ اور پاکستان نے حال ہی میں بالآخر مکہ جوائنٹ ڈیفنس ایگریمنٹ پر دستخط کردیئے ہیں۔

صدر ٹرمپ نے اسے بڑا، جرات مندانہ اور اہم پہلا قدم قرار دیتے ہوئے کہا کہ یہ معاہدہ ظاہر کرتا ہے کہ مشرقِ وسطیٰ متحد ہورہا ہے اور ممالک بالآخر زیادہ مؤثر انداز میں اپنا دفاع کرنے کے قابل ہوں گے۔

7 اگست کو طے پانے والے مکہ جوائنٹ ڈیفنس ایگریمنٹ کا مقصد کسی بھی جارحیت کے خلاف اجتماعی دفاعی صلاحیت کو مضبوط بنانا ہے۔ تینوں ممالک نے مشترکہ اعلامیے میں کہا کہ معاہدے کے تحت کسی ایک ملک پر مسلح حملہ تینوں ممالک پر حملہ تصور کیا جائے گا۔

دریں اثنا وزیراعظم شہباز شریف نے مکہ مشترکہ دفاعی معاہدے کی حمایت پر امریکی صدر ڈونلڈ ٹرمپ کے بیان کا خیرمقدم کرتے ہوئے کہا ہے کہ وہ اس معاہدے کے حق میں ٹرمپ کے الفاظ کو سراہتے ہیں۔

وزیراعظم شہبازشریف نے کہا کہ پاکستان سعودی عرب اور ترکیہ کے ساتھ مل کر اپنا اور خطے کا دفاع یقینی بنانےمیں کردار ادا کرتا رہے گا۔

وزیراعظم شہباز شریف نے کہا کہ میں ایک بار پھر صدر ٹرمپ کی جرات مندانہ اور فیصلہ کن قیادت کو سراہنا چاہوں گا جس نے جنوبی ایشیا میں جوہری تباہی کو ٹالنے اور لاکھوں جانیں بچانے میں مدد دی۔

وزیراعظم نے کہا کہ پائیدار امن عوام کے روشن اور خوشحال مستقبل کےلیے ضروری اور بنیادی شرط ہے۔

مکہ معاہدے کی بنیادی شق یہ ہے کہ معاہدے پر دستخط کرنے والے تینوں ممالک میں سے کسی ایک پر مسلح حملے کو تینوں پر حملہ تصور کیا جائے گا۔

یہ شق شمالی اوقیانوس معاہدہ تنظیم (نیٹو) کے چارٹر کے آرٹیکل 5 سے مماثلت رکھتی ہے۔

تاہم حملے کی صورت میں ہر رکن ملک پر عائد ہونے والی مخصوص ذمہ داریوں کی مکمل تفصیل دستیاب معلومات میں موجود نہیں ہے۔