نشاط گروپ کا کنسورشیم فیسکو کی نجکاری کی دوڑ میں شامل

نشاط گروپ کی متعدد کمپنیوں پر مشتمل ایک کنسورشیم نے فیصل آباد الیکٹرک سپلائی کمپنی (فیسکو) کی نجکاری کی دوڑ میں حصہ لے لیا ہے۔

یہ پیشرفت نشاط چونیاں پاور لمیٹڈ (این سی پی ایل) نے جمعرات کو پاکستان اسٹاک ایکسچینج (پی ایس ایکس) کو جاری کردہ نوٹس میں ظاہر کی۔

نوٹس کے مطابق نشاط چونیاں پاور لمیٹڈ نے نجکاری کے ذریعے فیصل آباد الیکٹرک سپلائی کمپنی (فیسکو) کی نجکاری کے لیے نجکاری کمیشن کی جانب سے وقتاً فوقتاً ترمیم یا تکمیل شدہ جاری کردہ ریکویسٹ فار اسٹیٹمنٹ آف کوالیفکیشن (آر ایس او کیو) حاصل کرلی ہے جبکہ کمپنی کے بورڈ آف ڈائریکٹرز نے کنسورشیم میں شرکت کی منظوری دے دی ہے۔

کنسورشیم میں نشاط چونیاں پاور لمیٹڈ، پاک جین لمیٹڈ، لال پیر لمیٹڈ، نشاط پاور لمیٹڈ، نشاط ملز لمیٹڈ، کوہِ نور انرجی لمیٹڈ اور پاک الیکٹرون لمیٹڈ شامل ہیں۔

معاہدے کے تحت کنسورشیم کے اراکین نے پاک جین لمیٹڈ کو لیڈ کنسورشیم رکن مقرر کرتے ہوئے نجکاری کے پورے عمل کے دوران تمام کاروباری امور انجام دینے اور کنسورشیم کی نمائندگی کرنے کا اختیار دے دیا ہے۔

این سی پی نے واضح کیا کہ اس نے اس لین دین کے حوالے سے کوئی پابند ذمہ داری قبول نہیں کی جبکہ یہ معاملہ نجکاری کمیشن کی جانب سے پری کوالیفکیشن اور تمام مطلوبہ کارپوریٹ و ریگولیٹری منظوریوں سے مشروط ہے۔

فیصل آباد الیکٹرک سپلائی کمپنی (فیسکو) پاکستان کی ان بجلی کی تقسیم کار کمپنیوں (ڈسکوز) میں شامل ہے جنہیں حکومت نے نجکاری کے لیے مقرر کیا ہے۔ یہ اقدام توانائی شعبے میں وسیع تر اصلاحاتی ایجنڈے کا حصہ ہے جس کا مقصد کارکردگی بہتر بنانا، بجلی کے نقصانات کم کرنا اور نجی سرمایہ کاری کو فروغ دینا ہے۔

فیسکو حکومت کے براہِ راست نجکاری کے پہلے مرحلے میں شامل ہے جس کے تحت اسلام آباد الیکٹرک سپلائی کمپنی (آئیسکو) اور گوجرانوالہ الیکٹرک پاور کمپنی (گیپکو) کو بھی نجی شعبے کے حوالے کیا جائے گا۔ وفاقی کابینہ نے ابتدائی طور پر اگست 2024 میں ان تینوں ڈسکوز کی براہِ راست نجکاری کی منظوری دی تھی۔

گزشتہ ماہ فیسکو کی اظہارِ دلچسپی جمع کرانے کی آخری تاریخ 7 اگست 2026 تک بڑھا دی گئی تھی۔