امریکی ریاست ایڈاہو کے شاپنگ سینٹر میں فائرنگ، 3 افراد ہلاک

امریکی ریاست ایڈاہوکے شہر ٹوئن فالز میں ہفتے کو ایک شاپنگ ایریا میں مسلح شخص کی فائرنگ کے نتیجے میں 3 افراد ہلاک ہوگئے۔

ٹوئن فالز شہر کے ترجمان کے مطابق واقعے میں تین افراد جان سے گئے۔ ٹوئن فالز پولیس چیف میتھیو ہکس نے صحافیوں کو بتایا کہ فائرنگ کرنے والا شخص بھی ہلاک ہو چکا ہے اور کمیونٹی کو درپیش خطرہ ختم ہوگیا ہے۔

شہر کے پبلک انفارمیشن کوآرڈینیٹر جوش پامر نے خبر رساں ادارے رائٹرز کو بتایا کہ مقامی وقت کے مطابق تقریباً دوپہر 2:30 بجے (پاکستانی وقت کے مطابق 8:30 بجے رات) ایک مصروف تجارتی علاقے میں، اِن اینڈ آؤٹ برگر ریسٹورنٹ کے قریب مسلح حملہ آور کی اطلاع ملی۔

تقریباً ایک گھنٹے بعد حکام نے تصدیق کی کہ حملہ آور مزید خطرہ نہیں رہا۔

پریس کانفرنس کے دوران پولیس چیف میتھیو ہکس نے کہا کہ انہیں ہلاکتوں کی درست تعداد معلوم نہیں، تاہم جوش پامر نے رائٹرز کو بتایا کہ 3 افراد ہلاک جبکہ کم از کم 2 زخمی ہوئے ہیں۔

پولیس چیف کے مطابق حملہ آور بھی ہلاک ہونے والوں میں شامل ہے۔ انہوں نے کہا کہ پولیس فائرنگ کرنے والے شخص کی شناخت اور حملے کے محرکات کا تعین کرنے کے لیے تحقیقات کر رہی ہے۔

ٹوئن فالز پولیس ڈیپارٹمنٹ نے فیس بک پر بتایا کہ واقعے کے فوری بعد علاقے کی سڑکیں اور قریبی پل بند کر دیے گئے تھے۔

تقریباً 47,400 آبادی والا ٹوئن فالز شہر وسطی ایڈاہو کے علاقے میجک ویلی میں واقع ہے۔