براڈ پیک برفانی تودہ حادثہ، ریسکیو آپریشن دوسرے روز میں داخل، جدید ڈرون کیمروں سے مدد حاصل

براڈ پیک کی چوٹی پر برفانی تودہ گرنے کے واقعے کے بعد لاپتا ہونے والے کوہ پیماؤں کی تلاش کے لیے دوسرے روز بھی وسیع پیمانے پر ریسکیو آپریشن جاری ہے۔

سرچ اینڈ ریسکیو مشن میں پاکستان کے نامور کوہ پیما سرباز خان، شہزاد اور دیگر بین الاقوامی کوہ پیما متحرک طور پر حصہ لے رہے ہیں۔

​ریسکیو ذرائع کے مطابق کوپیمائی کی تاریخ کے اس المناک حادثے میں لاپتا افراد کی تلاش کے لیے جدید ترین ڈرون کیمروں کی مدد لی جا رہی ہے تاکہ دشوار گزار اور خطرناک برفانی علاقوں میں لاپتا کوہ پیماؤں کی نشاندہی ممکن بنائی جا سکے۔​

گزشتہ روز ریسکیو ٹیموں نے انتھک محنت کے بعد تین کوہ پیماؤں کی لاشیں برآمد کر کے انہیں اسکردو منتقل کر دیا تھا جن میں ایک عمانی، ایک امریکی خاتون اور ایک نیپالی کوہ پیما شامل ہیں۔

​تاحال 7 کوہ پیما لاپتا ہیں جن میں پانچ نیپالی، ایک پاکستانی اور ایک چینی کوہ پیما شامل ہیں۔ لاپتا افراد میں نیپال کے عالمی ریکارڈ یافتہ کوہ پیما نمس (Nimsdai) اور پاکستان کے تجربہ کار کوہ پیما سہیل سخی بھی شامل ہیں جن کی سلامتی کے لیے کوہ پیمائی کی دنیا میں گہری تشویش پائی جاتی ہے۔​

واضح رہے کہ 30 جولائی کو براڈ پیک پر یکایک برفانی تودہ گرنے کی زد میں آ کر 10 کوہ پیما لاپتا ہوگئے تھے۔ ریسکیو ٹیمیں اور ضلعی انتظامیہ شگر و سکردو تمام دستیاب وسائل کا استعمال کرتے ہوئے امدادی کارروائیوں کو جاری رکھے ہوئے ہیں۔