چین کا پاکستان کیلئے غیر متزلزل حمایت کا اعادہ، مضبوط اسٹریٹجک شراکت داری کا عزم

چین نے ہفتے کو پاکستان کیلئے اپنی غیر متزلزل حمایت اور دونوں ممالک کے درمیان آل ویدر اسٹریٹجک کوآپریٹو پارٹنرشپ کو مزید مضبوط کرنے کے اپنے پائیدار عزم کا اعادہ کیا۔

انٹر سروسز پبلک ریلیشنز (آئی ایس پی آر) نے آج جاری کردہ ایک پریس ریلیز میں کہا کہ راولپنڈی میں جنرل ہیڈ کوارٹرز (جی ایچ کیو) میں عوامی جمہوریہ چین کی پیپلز لبریشن آرمی (پی ایل اے) کے قیام کی 99 ویں سالگرہ منائی گئی۔

تقریب کے مہمانِ خصوصی پاکستان میں چین کے سفیر جیانگ زائی ڈونگ تھے جب کہ  چین کے دفاعی اتاشی میجر جنرل وانگ ژونگ، چینی سفارت خانے کے حکام اور پاکستان کی تینوں مسلح افواج کے سینئر افسران بھی تقریب میں شریک ہوئے۔

فیلڈ مارشل، چیف آف آرمی اسٹاف اور چیف آف ڈیفنس فورسز سید عاصم منیر  نے معزز مہمانوں کا جی ایچ کیو میں خیرمقدم کرتے ہوئے پیپلز لبریشن آرمی کو اس کے 99 ویں یومِ تاسیس پر مبارکباد پیش کی۔

 انہوں نے چین کے دفاع، قومی ترقی اور عالمی امن و سلامتی کے لیے پی ایل اے کی خدمات کو خراجِ تحسین پیش کیا۔

پاکستان اور چین کے تعلقات کی دیرپا مضبوطی کو اجاگر کرتے ہوئے فیلڈ مارشل نے کہا کہ دونوں ممالک کی دوستی منفرد، آزمودہ اور وقت کی کسوٹی پر پوری اتری ہے، خطے اور دنیا کو درپیش بدلتے ہوئے چیلنجز کے باوجود یہ دوستی ہمیشہ مضبوط اور ثابت قدم رہی ہے۔

انہوں نے اس عزم کا اعادہ کیا کہ پاک فوج اور پیپلز لبریشن آرمی (پی ایل اے) حقیقی شراکت دار ہیں جو باہمی اعتماد، غیر متزلزل حمایت اور علاقائی امن، استحکام اور مشترکہ تزویراتی مفادات کے تحفظ کے عزم سے منسلک ہیں۔

تقریب سے خطاب کرتے ہوئے چینی سفیر جیانگ زائی ڈونگ نے دہشت گردی کے خلاف جنگ میں پاکستان کی مسلح افواج کی قربانیوں اور کردار کو سراہا۔ انہوں نے اس یادگاری تقریب کے انعقاد پر فیلڈ مارشل سید عاصم منیر کا شکریہ بھی ادا کیا۔

چینی سفیر نے پاکستان کی بھرپور حمایت اور دونوں ممالک کے درمیان آل ویدر اسٹریٹجک کوآپریٹو پارٹنرشپ کو مزید مضبوط بنانے کے چین کے غیر متزلزل عزم کا اعادہ کیا۔