حکومت نے ایک روز کے لیے پیٹرول 35 پیسے سستا، ڈیزل 5 روپے 71 پیسے مہنگا کر دیا

وفاقی حکومت نے پیر کو پیٹرول کی قیمت میں معمولی کمی جبکہ ہائی اسپیڈ ڈیزل (ایچ ایس ڈی) کی قیمت میں اضافہ کر دیا۔ نظرثانی شدہ قیمتیں پاکستان کے نئے یومیہ پیٹرولیم قیمتوں کے نظام کے تحت 21 جولائی سے نافذ ہوں گی۔

وزارتِ توانائی (پیٹرولیم ڈویژن) کے جاری کردہ نوٹیفکیشن کے مطابق آئل اینڈ گیس ریگولیٹری اتھارٹی (اوگرا) نے حکومت کے نئے پیٹرولیم قیمتوں کے طریقہ کار کے تحت ایکس ڈپو قیمتوں پر نظرثانی کی ہے۔

نوٹیفکیشن کے مطابق موٹر اسپرٹ (پیٹرول) کی قیمت میں 35 پیسے فی لیٹر کمی کی گئی ہے، جس کے بعد نئی قیمت 316 روپے 15 پیسے سے کم ہو کر 315 روپے 80 پیسے فی لیٹر مقرر کر دی گئی ہے۔

دوسری جانب ہائی اسپیڈ ڈیزل (ایچ ایس ڈی) کی قیمت میں 5 روپے 71 پیسے فی لیٹر اضافہ کیا گیا ہے، جس کے بعد نئی قیمت 354 روپے 35 پیسے سے بڑھ کر 360 روپے 6 پیسے فی لیٹر ہو گئی ہے۔

نظرثانی شدہ قیمتوں کا اطلاق 21 جولائی 2026 سے ہوگا۔

یہ تازہ نظرثانی حکومت کی جانب سے پیٹرولیم مصنوعات کی قیمتوں پر وقتاً فوقتاً نظرثانی کے سابقہ نظام کی جگہ یومیہ قیمتوں کے تعین کے نظام کے نفاذ کے بعد کی گئی ہے، تاکہ ملکی ایندھن کی قیمتوں کو عالمی منڈی میں تیل کی قیمتوں اور درآمدی لاگت میں روزانہ کی بنیاد پر ہونے والی تبدیلیوں سے ہم آہنگ رکھا جا سکے۔

گزشتہ جمعہ حکومت نے تین روز کے لیے پیٹرولیم مصنوعات کی قیمتوں میں اضافہ کیا تھا، جس کے تحت ہائی اسپیڈ ڈیزل کی قیمت میں 31 روپے 5 پیسے فی لیٹر جبکہ پیٹرول کی قیمت میں 5 روپے 44 پیسے فی لیٹر اضافہ کیا گیا تھا۔

اس سے قبل پاکستان میں پیٹرولیم مصنوعات کی قیمتوں پر ہر ہفتے نظرثانی کی جاتی تھی۔

تاہم وفاقی وزیرِ پیٹرولیم علی پرویز ملک نے گزشتہ ہفتے اعلان کیا تھا کہ عالمی منڈی میں خام تیل کی قیمتوں میں غیر معمولی اضافے کے پیشِ نظر اب ایندھن کی قیمتوں کا روزانہ کی بنیاد پر جائزہ لیا جائے گا۔