ایران پر امریکی حملوں کے بعد ڈالر ایک ہفتے کی بلند ترین سطح پر پہنچ گیا

امریکہ کی جانب سے ایران پر تازہ فضائی حملوں کے بعد بدھ کو ایشیائی کاروبار کے دوران امریکی ڈالر ایک ہفتے کی بلند ترین سطح پر پہنچ گیا، جبکہ نیوزی لینڈ کا ڈالر اس وقت نمایاں مضبوط ہوا جب وہاں کے مرکزی بینک نے شرح سود میں اضافہ کرتے ہوئے مزید سخت مالیاتی پالیسی کا عندیہ دیا۔

امریکی ڈالر جاپانی ین کے مقابلے میں 0.2 فیصد اضافے کے ساتھ 162.46 ین تک پہنچ گیا، جو 2 جولائی کے بعد اس کی بلند ترین سطح ہے۔ یورو 0.1 فیصد کمی کے ساتھ 1.1405 ڈالر جبکہ برطانوی پاؤنڈ بھی 0.1 فیصد گر کر 1.3351 ڈالر پر آ گیا۔

دوسری جانب ریزرو بینک آف نیوزی لینڈ نے توقعات کے مطابق شرح سود میں 25 بیسس پوائنٹس اضافہ کرتے ہوئے اسے 2.5 فیصد کر دیا۔ مرکزی بینک نے واضح کیا کہ مہنگائی پر قابو پانے کے لیے مالیاتی محرکات میں مزید کمی کی ضرورت پڑ سکتی ہے۔ اس اعلان کے بعد نیوزی لینڈ کا ڈالر (کیوی) 0.5 فیصد بڑھ کر 0.5705 امریکی ڈالر کی سطح پر پہنچ گیا، جبکہ آسٹریلوی ڈالر بھی معمولی اضافے کے ساتھ 0.6938 ڈالر پر ٹریڈ کرتا رہا۔

چھ بڑی کرنسیوں کے مقابلے میں امریکی ڈالر کی کارکردگی جانچنے والا ڈالر انڈیکس بڑھ کر 101.210 تک پہنچ گیا، جو گزشتہ ایک ہفتے کی بلند ترین سطح ہے۔

مارکیٹ میں محفوظ سرمایہ کاری سمجھے جانے والے امریکی ڈالر کی طلب اس وقت بڑھی جب امریکہ نے منگل کو ایران پر حملوں کا نیا سلسلہ شروع کیا اور آبنائے ہرمز میں تین آئل ٹینکروں پر حملوں کے بعد ایران کو تیل فروخت کرنے کی اجازت دینے والا لائسنس منسوخ کر دیا۔

ڈی بی ایس بینک کے تجزیہ کاروں کے مطابق سرمایہ کار فی الحال یہی سمجھ رہے ہیں کہ واشنگٹن اور تہران عارضی جنگ بندی کے دوران سفارتی دباؤ بڑھانے کی کوشش کر رہے ہیں اور موجودہ کشیدگی مکمل جنگ میں تبدیل نہیں ہوگی، تاہم اگست کے وسط میں عبوری جنگ بندی کے خاتمے اور آبنائے ہرمز میں جہاز رانی سے متعلق تنازع بدستور بڑا خطرہ ہے۔

ادھر برینٹ خام تیل کی قیمت 2.5 فیصد اضافے کے ساتھ 76.03 ڈالر فی بیرل تک پہنچ گئی۔ کرپٹو مارکیٹ میں بٹ کوائن 1.3 فیصد کمی کے بعد 62,851.94 ڈالر جبکہ ایتھر 1.9 فیصد گر کر 1,749.96 ڈالر پر آ گیا۔