ڈالر کے مقابلے روپے کی قدر میں معمولی اضافہ

انٹربینک مارکیٹ میں منگل کو ڈالر کے مقابلے روپے کی قدر میں معمولی اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 278.16 روپے پر بند ہوا۔

یاد رہے کہ پیر کو مقامی کرنسی 278.17 روپے پر بند ہوئی تھی۔

ڈالر انڈیکس 101.6 کی سطح پر رہا۔ یہ انڈیکس گزشتہ سیشن میں 0.26 فیصد کی گراوٹ کے بعد اس سطح پر آیا ہے، تاہم یہ دوسری سہ ماہی میں مجموعی طور پر 1.3 فیصد اضافے کی راہ پر گامزن ہے۔

یورو 1.14165 ڈالر پر رہا جبکہ برطانوی پاؤنڈ آخری بار 1.3251 ڈالر میں خریدا گیا۔ آسٹریلوی ڈالر میں 0.15 فیصد کمی واقع ہوئی اور یہ 0.6876 ڈالر پر آ گیا جبکہ نیوزی لینڈ ڈالر 0.5647 ڈالر پر ٹریڈ ہوا۔

ادھر منگل کو عالمی منڈی میں تیل کی قیمتوں میں گراوٹ دیکھی گئی اور قیمتیں ماہانہ بنیادوں پر کمی کی جانب گامزن ہیں۔

برینٹ کروڈ آئل کے اگست کے سودے جو منگل کو ختم ہو رہے ہیں 0.9 فیصد یا 64 سینٹس کی کمی کے بعد 72.51 ڈالر فی بیرل پرآگئے۔ یہ سطح گزشتہ ماہ کی اختتامی قیمت سے تقریباً 20 ڈالر یا 22 فیصد کم ہے۔

زیادہ فعال طور پر ٹریڈ ہونے والا ستمبر کا معاہدہ 0.4 فیصد یا 31 سینٹس گر کر 73.6 ڈالر فی بیرل پر رہا۔

امریکی ویسٹ ٹیکساس انٹرمیڈیٹ کا اگست کا معاہدہ 0.6 فیصد یا 39 سینٹس گر کر 70.36 ڈالر فی بیرل پر آ گیا۔