شپنگ انڈسٹری پر 18 فیصد سیلز ٹیکس کا خاتمہ میری ٹائم اکانومی کیلئے گیم چینجر، وفاقی وزیر بحری امور

وفاقی وزیر برائے بحری امور محمد جنید انور چوہدری نے ہفتے کو کہا ہے کہ حکومت کی جانب سے شپنگ انڈسٹری پر عائد 18 فیصد سیلز ٹیکس ختم کرنے کا فیصلہ میری ٹائم معیشت کو مضبوط بنانے کی جانب ایک اہم قدم ہے۔

وفاقی وزیر نے کہا کہ سیلز ٹیکس کے خاتمے سے میری ٹائم (سمندری) اور لاجسٹکس کے شعبوں کو فروغ ملے گا اور اس سے کاروباری لاگت میں نمایاں کمی متوقع ہے۔

انہوں نے مزید کہا کہ اس سے مقامی شپنگ کمپنیوں کی مسابقتی طاقت میں بہتری آئے گی اور سرمایہ کاری کے نئے مواقع پیدا ہوں گے۔

مقامی شپنگ انڈسٹری کی ترقی سے روزگار کے مواقع بھی بڑھیں گے۔

وزیر خزانہ محمد اورنگزیب نے جمعہ کو مالی سال 2026-27 کے لیے 18.77 ٹریلین روپے کا وفاقی بجٹ پیش کیا جس میں تنخواہ دار طبقے کو ریلیف دیا گیا ہے اور صنعتوں کی بحالی، سرمایہ کاری کو فروغ دینے اور معیشت کو 4 فیصد ترقی کے ہدف کی طرف لے جانے کے لیے رئیل اسٹیٹ، تعمیراتی شعبوں اور برآمد کنندگان کو ٹیکس مراعات دی گئی ہیں۔

رواں مالی سال تقریباً 1 ٹریلین روپے کے متوقع ریونیو شارٹ فال کا سامنا کرنے کے باوجود حکومت نے مالی سال 27-2026 کے لیے 15.264 ٹریلین روپے کا ایک پرعزم ریونیو ہدف مقرر کیا ہے۔ موجودہ مالی سال کے 12.983 ٹریلین روپے کے نظرثانی شدہ تخمینہ محصولات کے مقابلے میں، یہ ہدف اگلے سال کے لیے محصولات کی وصولی میں 17.6 فیصد کی نمایاں نمو کی عکاسی کرتا ہے۔