سعودی عرب: ڈاکٹر شہزادی مہا آل سعود فیوچر انویسٹمنٹ انیشی ایٹو انسٹیٹیوٹ کا سربراہ مقرر

سعودی عرب کے فیوچر انویسٹمنٹ انیشی ایٹو انسٹیٹیوٹ نے شہزادی مہا آل سعود کو اپنا چیف ایگزیکٹو مقرر کر دیا ہے۔ یہ وہ ادارہ ہے جو ہر سال ایک بڑے سرمایہ کاری اجلاس کا انعقاد کرتا ہے، جس میں وال اسٹریٹ کی نمایاں شخصیات اور عالمی سرمایہ کار ریاض کا رخ کرتے ہیں۔

ریاض میں منعقد ہونے والے سالانہ اجلاس کے علاوہ یہ ادارہ غیر ملکی سرمایہ کاری کے فروغ اور عالمی سرمایہ کاروں کو متوجہ کرنے کے لیے دنیا بھر میں اقتصادی کانفرنسوں اور فورمز کا بھی اہتمام کرتا ہے۔

ادارے کی ویب سائٹ پر ظاہر کی گئی اس قیادت کی تبدیلی کا اعلان ایسے وقت میں سامنے آیا ہے جب رواں ماہ کے آخر میں روم میں اس کی ایک کانفرنس منعقد ہونے والی ہے۔ اس سے قبل مارچ میں میامی میں ہونے والی اس کی تقریب میں امریکی صدر ڈونلڈ ٹرمپ نے بھی شرکت کی تھی۔

پیشہ کے اعتبار سے ڈاکٹر شہزادی مہا آل سعود اس سے قبل ریاض میں واقع الفیصل یونیورسٹی میں خارجہ تعلقات اور ترقی ( ایکسٹرنل ریلیشنز اینڈ ایڈوانسمنٹ) کی نائب صدر کے طور پر خدمات انجام دے چکی ہیں۔ وہ جی 20 سمیت متعدد اہم بین الاقوامی فورمز میں سعودی عرب کی نمائندگی بھی کر چکی ہیں، جبکہ چوتھے یوریشین ویمن فورم میں بھی شریک رہی ہیں۔

ویب سائٹ کے مطابق ادارے کے بانی اور طویل عرصے تک چیف ایگزیکٹو رہنے والے رچرڈ اٹیس اب سی ای او کے عہدے پر نہیں رہے، تاہم وہ ایگزیکٹو کمیٹی کے چیئرمین کی حیثیت برقرار رکھیں گے۔

یہ ادارہ 2019 میں سعودی عرب کے خودمختار دولت فنڈ پبلک انویسٹمنٹ فنڈ ( پی آئی ایف ) کی شراکت سے بطور بانی پارٹنر قائم کیا گیا تھا۔ یہ انسٹی ٹیوٹ دراصل فیوچر انویسٹمنٹ انیشی ایٹو کی سالانہ کانفرنس سے وجود میں آیا، جس کا پہلا اجلاس 2017 میں ریاض میں منعقد ہوا تھا۔