ایشین گیمز کرکٹ فائنل: بھارت نے پاکستان کو شکست دے کر گولڈ میڈل جیت لیا

ایشین گیمز کے مینز کرکٹ ایونٹ کے گولڈ میڈل میچ میں روایتی حریف بھارت نے پاکستان کو 19 رنز سے شکست دے دی۔

212 رنز کے بڑے ہدف کے تعاقب میں پاکستان نے 20 اوورز میں 8 وکٹوں کے نقصان پر 192 رنز بنائے ۔ حسن نواز نے 51 گیندوں پر 96 رنز کی جارحانہ اننگز کھیلی جس میں 7 چھکے اور 5 چوکے شامل تھے۔

پاکستان کی اننگز کا آغاز مشکل رہا، کپتان صاحبزادہ فرحان واشنگٹن سندر کی گیند پر کیچ آؤٹ ہونے سے قبل 11 گیندوں پر 10 رنز ہی بنا سکے۔ اوپنر معاذ صداقت نے 18 گیندوں پر 23 رنز بنائے جبکہ عثمان خان 6 گیندوں پر 3 رنز بنا کر آؤٹ ہوگئے۔

ساتویں اوور میں اکشر پٹیل نے صداقت کو کلین بولڈ کردیا جس کے بعد حسن نواز اور صائم ایوب نے 80 سے زائد رنز کی شراکت قائم کرکے پاکستان کی ہدف کے تعاقب کی امیدیں بحال کر دیں۔

صائم ایوب نے 15ویں اوور میں شیوم دوبے کی گیند پر کیچ آؤٹ ہونے سے قبل 22 گیندوں پر 29 رنز بنائے جس کے بعد حسن نواز پر ہدف کے تعاقب کی ذمہ داری آ گئی۔ اپنی 96 رنز کی شاندار اننگز کے باوجود پاکستان ہدف حاصل نہ کر سکا۔

اس سے قبل بھارت نے پہلے بیٹنگ کا فیصلہ کرتے ہوئے 20 اوورز میں 6 وکٹوں کے نقصان پر 211 رنز بنائے۔

ابھیشیک شرما نے بھارت کو جارحانہ آغاز فراہم کیا اور 20 گیندوں پر نصف سنچری مکمل کرنے کے بعد کوروگی ایتھلیٹک پارک اسٹیڈیم میں جارحانہ بیٹنگ کرتے ہوئے 61 رنز بنائے۔

بھارت نے صرف 55 گیندوں پر 100 رنز مکمل کر لیے، تاہم پاکستان کے بولرز نے فارم میں موجود بلے باز ایشان کشن کو 20 اور کپتان شریاس ایئر کو 21 رنز پر آؤٹ کرکے کچھ حد تک صورتحال پر قابو پالیا۔

اس کے بعد تلک ورما اور شیوم دوبے نے آخری اوورز میں جارحانہ بیٹنگ کرتے ہوئے پانچ اوورز میں چھٹی وکٹ کے لیے 62 رنز کی شراکت قائم کی اور بھارت کو 6 وکٹوں پر 211 رنز تک پہنچا دیا۔

بھارت کا یہ اسکور ٹورنامنٹ کا سب سے بڑا مجموعہ تھا جس نے سیمی فائنل میں سری لنکا کے خلاف 169 رنز پر 7 وکٹوں کے اس کے سابقہ بہترین اسکور کو پیچھے چھوڑ دیا۔