کمزور مون سون اور ایندھن کی قیمتوں میں اضافے سے بھارت میں مہنگائی بڑھنے کا خدشہ

بھارت کی وزارتِ خزانہ نے ہفتے کے روز جاری ایک رپورٹ میں کہا ہے کہ حالیہ ایندھن کی قیمتوں میں اضافے اور معمول سے کمزور مون سون بارشوں کے باعث ملک میں خوردہ مہنگائی میں اضافہ ہو سکتا ہے، جبکہ مشرقِ وسطیٰ میں جاری تنازع کے سبب توانائی کی سپلائی میں رکاوٹیں برقرار ہیں۔

رپورٹ کے مطابق آبنائے ہرمز میں خلل کا دورانیہ بھارت کے بیرونی شعبے اور مہنگائی کے منظرنامے کے لیے ”سب سے اہم اور فیصلہ کن عامل“ ہے۔

رپورٹ میں کہا گیا ہے کہ خام سطح پر قیمتوں کے دباؤ میں نمایاں اضافے اور حالیہ ایندھن مہنگا ہونے کے بعد آنے والے مہینوں میں اس کے اثرات بتدریج خوردہ مہنگائی تک منتقل ہونے کا امکان ہے، جس کے نتیجے میں نقل و حمل، توانائی اور خوراک سے متعلق اخراجات میں اضافہ ہو سکتا ہے۔

رپورٹ میں کہا گیا ہے کہ بارشوں میں نمایاں کمی اور موجودہ جغرافیائی سیاسی حالات مل کر خوراک کی مہنگائی میں اضافے کا سبب بن سکتے ہیں، جس سے دیہی علاقوں میں طلب کمزور پڑ سکتی ہے اور مجموعی اقتصادی نمو بھی متاثر ہو سکتی ہے۔

رپورٹ کے مطابق قلیل مدت میں بھارتی معیشت کا منظرنامہ محتاط استحکام کا عکاس ہے۔

مزید کہا گیا ہے کہ عالمی سطح پر توانائی کی بلند قیمتیں، بھارتی روپیہ کی قدر میں کمی، خام سطح پر پیداواری لاگت کے بڑھتے ہوئے دباؤ اور معمول سے کم مون سون بارشوں کے امکانات ایسے عوامل ہیں جو پالیسی سازوں سے مسلسل چوکسی اور محتاط نگرانی کا تقاضا کرتے ہیں۔

بھارت میں سالانہ خوردہ مہنگائی کی شرح اپریل میں معمولی اضافے کے ساتھ 3.48 فیصد تک پہنچ گئی، تاہم یہ اب بھی مرکزی بینک کے مقررہ ہدف سے کم ہے۔

بھارت کی وزارتِ خزانہ ہر ماہ اپنی اقتصادی رپورٹ جاری کرتی ہے۔