مشرق وسطی میں بڑھتی کشیدگی کے بعد ڈالر ایک ہفتے کی بلند ترین سطح پر پہنچ گیا

امریکہ اور ایران کے درمیان بڑھتی ہوئی کشیدگی کے باعث جمعرات کو امریکی ڈالر ایک ہفتے کی بلند ترین سطح پر پہنچ گیا، جبکہ جاپانی ین کمزور ہو کر اس سطح کے قریب پہنچ گیا جہاں گزشتہ ماہ جاپانی مرکزی بینک کو مداخلت کرنا پڑی تھی۔

ایرانی پاسدارانِ انقلاب نے دعویٰ کیا کہ انہوں نے بندر عباس ایئرپورٹ کے قریب امریکی حملے کے جواب میں ایک امریکی فضائی اڈے کو نشانہ بنایا۔ ایرانی خبر رساں ادارے تسنیم کے مطابق ایران نے خبردار کیا ہے کہ کسی بھی نئی جارحیت کا مزید سخت جواب دیا جائے گا۔ دوسری جانب کویت کی فوج نے کہا ہے کہ اس کے فضائی دفاعی نظام دشمن کے میزائل اور ڈرون حملوں کو روک رہے ہیں۔

اس سے قبل امریکی فوج نے ایران میں ڈرون آپریشن سے متعلق مقامات پر نئے حملے کیے تھے، جنہیں امریکہ نے آبنائے ہرمز میں اپنی افواج اور تجارتی جہاز رانی کے لیے خطرہ قرار دیا۔

مشرق وسطیٰ میں کشیدگی بڑھنے کے بعد تیل کی قیمتوں میں دوبارہ اضافہ ہوا، جبکہ محفوظ سرمایہ کاری سمجھے جانے والے امریکی ڈالر کو بھی تقویت ملی۔ تجزیہ کاروں کے مطابق توانائی کی بلند قیمتوں کے باعث مہنگائی میں اضافے کا خدشہ ہے، جس سے امریکی فیڈرل ریزرو شرح سود میں کمی کے بجائے سخت مؤقف اختیار کر سکتا ہے۔

یورو 0.2 فیصد کمی کے ساتھ 1.1600 ڈالر پر آ گیا، جبکہ برطانوی پاؤنڈ بھی تقریباً 0.3 فیصد گر گیا۔ آسٹریلوی اور نیوزی لینڈ ڈالرز میں بھی کمی ریکارڈ کی گئی۔

ادھر جاپانی ین 159.610 فی ڈالر تک کمزور ہو گیا، جو اپریل کے بعد کم ترین سطح ہے۔ ماہرین کا کہنا ہے کہ اگر ین دوبارہ 160 کی سطح عبور کرتا ہے تو جاپانی حکام دوبارہ مداخلت کر سکتے ہیں۔