ممبئی انڈینز کی مشکلات برقرار، ہاردک پانڈیا کی میچ فیس کٹ گئی

ممبئی انڈینز کی کولکتہ نائٹ رائیڈرز کے ہاتھوں چار وکٹوں سے شکست کے بعد لیگ انتظامیہ نے جمعرات کو بتایا کہ ممبئی کے کپتان ہاردک پانڈیا پر آئی پی ایل کے ضابطہ اخلاق کی خلاف ورزی کرنے پر میچ فیس کا 10 فیصد جرمانہ عائد کر دیا گیا ہے اور ان کا ایک ڈی میرٹ پوائنٹ بھی کاٹ لیا گیا ہے۔

لیگ انتظامیہ کے مطابق پانڈیا پر یہ جرمانہ بدھ کو ایڈن گارڈنز میں کھیلے گئے میچ کے دسویں اوور کے دوران کرکٹ کے سامان کے غلط استعمال پر لگایا گیا، جہاں انہوں نے اپنے رن اپ کی طرف واپس جاتے ہوئے غصے میں وکٹوں پر لگی بیلز (گلیاں) زور سے گرا دی تھیں۔

32 سالہ آل راؤنڈر نے آئی پی ایل ضابطہ اخلاق کے آرٹیکل 2.2 کی خلاف ورزی کے جرم کا اعتراف کیا اور میچ ریفری کی طرف سے دی گئی سزا کو تسلیم کر لیا ہے۔

اس فتح کی بدولت کولکتہ نے پوائنٹس ٹیبل پر چھٹی پوزیشن حاصل کر کے پلے آف میں پہنچنے کی اپنی امیدیں زندہ رکھی ہیں، جبکہ ممبئی کی ٹیم نویں نمبر پر پستی کا شکار ہے۔

پانچ بار کی چیمپئن ممبئی انڈینز کے لیے یہ سیزن انتہائی مایوس کن رہا ہے اور وہ 13 میچوں میں سے صرف چار میں کامیابی حاصل کرکے پلے آف کی دوڑ سے پہلے ہی باہر ہو چکی ہے۔