پرائیوٹائزیشن کمیشن نے پی آئی اے کی نجکاری کے پہلے مرحلے کی منظوری دے دی

پرائیوٹائزیشن کی وزارت کے جاری کردہ بیان کے مطابق پرائیوٹائزیشن کمیشن (پی سی) بورڈ نے بدھ کے روز پاکستان انٹرنیشنل ایئرلائنز کارپوریشن لمیٹڈ (پی آئی اے سی ایل) کی نجکاری کے پہلے مرحلے کے نفاذ کے لیے ضروری منظوری دے دی۔

بورڈ کے 252 ویں اجلاس کی صدارت محمد علی نے کی، جس میں ارکان نے لین دین کے پہلے مرحلے پر پیش رفت کا جائزہ لیا۔

اجلاس کے دوران، مالی مشیر نے بورڈ کو شیئر پرچیز اینڈ سبسکرپشن ایگریمنٹ ( ایس پی ایس اے) میں بیان کردہ شرائط کی تکمیل کی جانب پیش رفت کے بارے میں بریف کیا، جس میں پہلے مرحلے کی تکمیل کے لیے ضروری اہم ریگولیٹری، مالی اور لین دین سے متعلق تقاضے شامل تھے۔

بورڈ نے اب تک حاصل ہونے والی پیش رفت پر اطمینان کا اظہار کیا اور لین دین کے عمل کو آگے بڑھانے کے لیے درکار اقدامات کی منظوری دی۔

بورڈ نے حکومت کے اس عزم کو بھی دہرایا کہ نجکاری کے پروگرام کو شفاف، مسابقتی اور پیشہ ورانہ انداز میں جاری رکھا جائے گا، جس کا مقصد کارکردگی میں بہتری، سرمایہ کاروں کے اعتماد کو مضبوط کرنا اور پائیدار اقتصادی اصلاحات کی حمایت کرنا ہے۔