روس اور چین خودمختاری کے تحفظ سمیت مختلف امور پر ایک دوسرے کی حمایت کرینگے، پیوٹن

روس کے صدر ولادیمیر پیوٹن نے کہا ہے کہ روس اور چین ایک دوسرے کی وسیع تر امور میں حمایت کے لیے تیار ہیں، جن میں قومی وحدت اور خودمختاری کا تحفظ بھی شامل ہے۔ انہوں نے یہ بات چین کے دورے سے قبل ایک ویڈیو خطاب میں کہی، یہ دورہ منگل سے شروع ہو رہا ہے۔

پیوٹن نے کہا کہ روس اور چین کے درمیان تعلقات بے مثال سطح تک پہنچ چکے ہیں، جہاں باہمی اعتماد اور افہام و تفہیم میں نمایاں اضافہ ہوا ہے۔ وہ بدھ کے روز چینی صدر شی جن پنگ سے ملاقات اور اہم مذاکرات کریں گے۔

انہوں نے کہا کہ دونوں ممالک مساوات اور باہمی فائدے کے اصولوں پر تعاون کے لیے تیار ہیں اور ایک دوسرے کی بنیادی قومی مفادات، بشمول خودمختاری اور قومی وحدت کے تحفظ میں حمایت کریں گے۔ تاہم انہوں نے اس حوالے سے مزید تفصیلات فراہم نہیں کیں۔

پیوٹن کے مطابق روس اور چین معاشی، سیاسی اور دفاعی شعبوں میں تعاون کو مسلسل وسعت دے رہے ہیں، اور دونوں ممالک کے درمیان قریبی اور اسٹریٹجک تعلقات عالمی استحکام میں اہم کردار ادا کر رہے ہیں۔

انہوں نے کہا کہ ہم کسی کے خلاف اتحاد نہیں بنا رہے بلکہ امن اور عالمی خوشحالی کے لیے کام کر رہے ہیں۔