بولرز کی تباہ کن کارکردگی اور جوائے کی اہم نصف سینچری : دوسرے ٹیسٹ میں بنگلہ دیش کی پوزیشن مستحکم

اوپنر محمود الحسن جوائے کی شاندار نصف سینچری اور بولرز کی تباہ کن کارکردگی کی بدولت بنگلہ دیش نے اتوار کو پاکستان کے خلاف دوسرے ٹیسٹ میچ پر اپنی گرفت مضبوط کر لی ہے۔

دو میچوں کی سیریز میں 1-0 کی برتری حاصل کرنے والے بنگلہ دیش نے سلہٹ ٹیسٹ کے دوسرے دن کا کھیل ختم ہونے پر اپنی دوسری اننگز میں 3 وکٹوں کے نقصان پر 110 رنز بنا لیے ہیں، جس کے بعد اسے پاکستان پر مجموعی طور پر 156 رنز کی برتری حاصل ہو گئی ہے۔ پہلی اننگز میں صفر پر آؤٹ ہونے والے محمود الحسن جوائے نے دوسری اننگز میں زبردست کم بیک کیا اور 64 گیندوں پر 52 رنز کی اننگز کھیلی، تاہم وہ فاسٹ بولر محمد عباس کا شکار بنے۔ تنزید حسن صرف 4 رنز بنا کر خرم شہزاد کی گیند پر آؤٹ ہوئے، جنہوں نے دن کے آخری اوور میں مومن الحق (30 رنز) کو بھی پویلین کی راہ دکھائی۔ کپتان نجم الحسین شانتو 13 رنز کے ساتھ وکٹ پر موجود ہیں۔

اس سے قبل لیفٹ آرم اسپنر تاجل اسلام اور تیز رفتار بولر ناہید رانا نے تین تین وکٹیں حاصل کر کے پاکستانی ٹیم کو پہلی اننگز میں 232 رنز پر ڈھیر کر دیا، جس سے بنگلہ دیش کو پہلی اننگز میں 46 رنز کی قیمتی برتری حاصل ہوئی۔ مہمان ٹیم کی جانب سے صرف بابر اعظم ہی مزاحمت دکھا سکے جنہوں نے 10 چوکوں کی مدد سے 68 رنز بنائے۔ میچ کے دوسرے دن بنگلہ دیشی پیسر تسکین احمد نے اوور نائٹ اوپنرز عبداللہ فضل اور اذان اویس کو جلد آؤٹ کیا، جبکہ اسپنر مہدی حسن معراج نے لنچ سے قبل کپتان شان مسعود اور سعود شکیل کو پویلین بھیجا۔ ناہید رانا اور تاجل اسلام نے دوپہر کے سیشن میں بقیہ چھ وکٹیں آپس میں بانٹیں۔

پاکستانی بیٹر بابر اعظم نے اعتراف کیا کہ ان کے آؤٹ ہونے سے ٹیم کو بڑا نقصان پہنچا۔ انہوں نے کہا میرا اور سلمان علی آغا کا آؤٹ ہونا میچ کا ٹرننگ پوائنٹ ثابت ہوا، اس کے بعد ہم کوئی پارٹنرشپ قائم نہ کر سکے اور ان دو وکٹوں نے کھیل کا پانسہ پلٹ دیا۔ دوسری جانب تین ٹیسٹ میچوں میں بابر اعظم کو تین بار آؤٹ کرنے والے 23 سالہ ناہید رانا نے حریف ٹیم کو خبردار کرتے ہوئے کہا کہ میں نہیں جانتا کہ وہ مجھے باؤنسر کرنے سے پہلے دو بار سوچیں گے یا نہیں، لیکن اتنا کہہ سکتا ہوں کہ اگر کسی نے مجھے باؤنسر مارا تو میں اسے آسانی سے نہیں چھوڑوں گا۔ ناہید رانا تیسرے دن کے کھیل کے حوالے سے بھی پراعتماد نظر آئے اور کہا کہ ہمارا کوئی مخصوص ٹارگٹ نہیں ہے، ابھی تین دن باقی ہیں اور ہم کل پورا دن بیٹنگ کرنے کی کوشش کریں گے۔

واضح رہے کہ دوسرے ٹیسٹ میں بنگلہ دیش کی اس مضبوط پوزیشن کی بنیاد ہفتے کے روز لٹن داس کی جادوئی اننگز نے رکھی تھی۔ جب بنگلہ دیش کی ٹیم 106 پر 4 اور پھر 116 پر 6 وکٹیں گنوا کر شدید مشکلات کا شکار تھی، تب لٹن داس نے 16 چوکوں اور 2 چھکوں کی مدد سے 126 رنز کی شاندار اننگز کھیل کر ٹیم کا اسکور 278 رنز تک پہنچایا تھا۔