براکہ پلانٹ کے قریب ڈرون حملہ : متحدہ عرب امارات میں تابکاری کے اثرات معمول کے مطابق ہیں، آئی اے ای اے

ابوظہبی میڈیا آفس نے بتایا کہ حکام نے الظفرہ ریجن میں واقع براکہ نیوکلیئر پاور پلانٹ کی اندرونی حدود سے باہر ایک الیکٹریکل جنریٹر میں لگنے والی آگ پر قابو پا لیا ہے، یہ آگ ڈرون حملے کی وجہ سے لگی تھی۔

حکام کے مطابق واقعے میں کسی جانی نقصان کی کوئی اطلاع نہیں ملی اور ریڈیولاجیکل سیکیورٹی کے معیار پر بھی کوئی اثر نہیں پڑا۔ ایٹمی قوانین کے وفاقی ادارے نے تصدیق کی ہے کہ پاور پلانٹ کے تمام ضروری اور حساس نظام معمول کے مطابق کام کر رہے ہیں۔ تاہم سرکاری بیان میں یہ واضح نہیں کیا گیا کہ یہ ڈرون حملہ کس طرح اور کہاں سے کیا گیا۔

دوسری جانب بین الاقوامی ایٹمی توانائی ایجنسی (آئی اے ای اے) کا کہنا ہے کہ متحدہ عرب امارات نے اسے مطلع کیا ہے کہ اس واقعے کے بعد براکہ پلانٹ میں تابکاری کی سطح بالکل نارمل ہے۔ اقوامِ متحدہ کے جوہری نگراں ادارے نے مزید کہا کہ آئی اے ای اے صورتحال کی باریک بینی سے نگرانی کر رہا ہے اور اماراتی حکام کے ساتھ مسلسل رابطے میں ہے تاکہ ضرورت پڑنے پر فوری امداد فراہم کی جا سکے۔واضح رہے کہ اسرائیل، امریکہ اور ایران کے حالیہ تنازع کے دوران متحدہ عرب امارات کو بارہا میزائل اور ڈرون حملوں کا سامنا کرنا پڑا ہے۔

اس سے قبل جمعہ کے روز متحدہ عرب امارات کی وزارتِ خارجہ نے اپنے ایک بیان میں ایران کے الزامات اور یو اے ای پر حملوں کا جواز پیش کرنے کی کوششوں کو یکسر مسترد کر دیا تھا۔ اماراتی وزارتِ خارجہ کا کہنا تھا کہ وہ کسی بھی خطرے یا جارحانہ کارروائی کا جواب دینے کے لیے اپنے تمام خودمختار، قانونی، سفارتی اور فوجی حقوق محفوظ رکھتا ہے۔