پہلا ٹیسٹ: بنگلہ دیش نے پاکستان کو 104 رنز سے شکست دیدی

میرپور میں کھیلے گئے پہلے ٹیسٹ میچ کے آخری روز ناہید رانا نے 40 رنز دے کر 5 کھلاڑیوں کو آؤٹ کیا اور بنگلہ دیش کو پاکستان کے خلاف 104 رنز سے فتح دلا دی۔

میرپور میں کھیلے گئے میچ میں میزبان ٹیم نے کھیل کے پانچویں روز اپنی دوسری اننگز 240 رنز 9 کھلاڑی آؤٹ پر ڈکلیئر کرکے پاکستان کو جیت کے لیے 268 رنز کا ہدف دیا۔

پاکستان کی پوری ٹیم ہدف کے تعاقب میں صرف 163 رنز پر ڈھیر ہوگئی۔ بنگلہ دیش نے آخری سیشن میں 7 وکٹیں حاصل کر کے دو ٹیسٹ میچوں کی سیریز میں 0-1 کی برتری حاصل کر لی ہے۔

ڈبییوٹنٹ عبداللہ فضل 66 رنز بناکر نمایاں رہے۔ دیگر کوئی بلے باز خاطر خواہ کارکردگی نہ دکھا سکا۔

سلمان علی آغا 26، محمد رضوان، سعود شکیل اور اذان اویس 15، 15 رنز بناکر آؤٹ ہوئے جبکہ نعمان علی 4، امام الحق اور کپتان شان مسعود 2، 2، حسن علی ایک اور شاہین آفریدی بغیر کوئی رن بنائے آؤٹ ہوئے۔

بنگلادیش کی جانب سے ناہید رانا نے 5، تیج الاسلام اور تسکین احمد نے 2، 2 جبکہ مہدی حسن میراز نے ایک وکٹ حاصل کی۔

یاد رہے کہ بنگلادیش نے پہلی اننگز میں 413 رنز بنائے تھے جس کے جواب میں پاکستان ٹیم اپنی پہلی اننگز میں 386 رنز بناکر آؤٹ ہوگئی تھی۔

بنگلہ دیشی کپتان شانتو نے پلیئر آف دی میچ کا ایوارڈ وصول کرنے کے بعد کہا کہ جس طرح تمام کھلاڑیوں نے پرفارمنس دی مجھے ان سب پر فخر ہے۔

پاکستان کے کپتان شان مسعود نے کہا کہ ہم گیند اور بلے دونوں کے ساتھ بہتر کارکردگی نہیں دکھا سکے۔ میرا خیال تھا کہ ہمیں پہلی اننگز میں مزید رنز بنانے چاہیے تھے۔