علاقائی امن کے لیے پاکستان کی سفارتی کوششیں قابل ستائش ہیں، مندوب اقوام متحدہ

دفترِ خارجہ کے مطابق مشرقِ وسطیٰ کے تنازع کے لیے اقوامِ متحدہ کے سیکرٹری جنرل کے ذاتی ایلچی ژاں ارناولٹ نے پیر کو نائب وزیراعظم اور وزیرِ خارجہ سینیٹر محمد اسحاق ڈار سے ملاقات کی، جس میں خطے کی بدلتی ہوئی صورتحال پر تبادلہ خیال کیا گیا۔

ملاقات کے دوران اقوامِ متحدہ کے مندوب نے خطے میں امن و استحکام کے فروغ کے لیے پاکستان کی سفارتی کوششوں کے اعتراف میں یو این سیکرٹری جنرل کا تعریفی پیغام پہنچایا۔ انہوں نے ان کوششوں کے لیے اقوامِ متحدہ کے مسلسل تعاون کے عزم کا بھی اعادہ کیا۔

نائب وزیراعظم اور وزیرِ خارجہ نے حالیہ علاقائی پیش رفت پر پاکستان کا نقطہ نظر بیان کیا اور متعلقہ اسٹیک ہولڈرز کے ساتھ اسلام آباد کے جاری سفارتی رابطوں پر روشنی ڈالی۔ انہوں نے اس بات پر زور دیا کہ پاکستان مذاکرات اور مثبت روابط کے ذریعے علاقائی استحکام میں اپنا حصہ ڈالنے کے لیے مسلسل کوشاں ہے۔

سینیٹر اسحاق ڈار نے علاقائی مسائل پر مسلسل توجہ دینے اور پاکستان کے لیے دیرینہ حمایت پر اقوامِ متحدہ کے سیکرٹری جنرل کا شکریہ ادا کیا۔ دونوں جانب سے اس بات پر اتفاق کیا گیا کہ علاقائی چیلنجز سے نمٹنے اور پائیدار امن کے فروغ کے لیے مستقل سفارتی رابطے اور مربوط کوششیں انتہائی اہمیت کی حامل ہیں۔