ورلڈ کپ میں شرکت کے لیے پاسدارانِ انقلاب کے احترام سے متعلق فیفا کی ضمانتیں ناگزیر ہیں، سربراہ ایرانی فٹ بال فیڈریشن

ایرانی فٹ بال فیڈریشن (ایف ایف آئی آر آئی) کے صدر مہدی تاج نے مطالبہ کیا ہے کہ اگر قومی ٹیم نے جون میں ہونے والے ورلڈ کپ کے لیے امریکہ جانا ہے تو فیفا اس بات کی ضمانت دے کہ وہاں پاسدارانِ انقلاب (آئی آر جی سی) کی توہین نہیں کی جائے گی۔

یاد رہے کہ گزشتہ ہفتے کینیڈا کے بارڈر پر بدسلوکی کے بعد مہدی تاج اور وفد واپس لوٹ آئے تھے، جبکہ کینیڈین وزیرِ داخلہ نے واضح کیا کہ آئی آر جی سی سے تعلق کی بنا پر مہدی تاج کا ویزا دورانِ پرواز ہی منسوخ کر دیا گیا تھا۔ امریکہ اور کینیڈا نے اس فورس کو دہشت گرد قرار دے رکھا ہے۔

مہدی تاج جو خود بھی اس فورس کے سابق اعلیٰ عہدیدار ہیں نے تہران میں ایک ریلی کے دوران کہا کہ ہمارا میزبان فیفا ہے، ٹرمپ یا امریکہ نہیں۔انہوں نے زور دیا کہ اگر تحریری ضمانت نہ ملی تو ایرانی وفد امریکی سرحد سے بھی واپس آ سکتا ہے۔ ایران کے دو میچ لاس اینجلس اور ایک سیاٹل میں شیڈول ہیں، تاہم فروری میں امریکہ اور اسرائیل کے فضائی حملوں کے بعد سے ایران کی شرکت پر پہلے ہی سوالات اٹھ رہے ہیں۔ اس وقت ایرانی کھلاڑی تہران میں تربیتی کیمپ میں موجود ہیں اور ترکیہ میں دوستانہ میچ کھیلنے کی تیاری کر رہے ہیں۔